Vedomstvoaralyq komıssııa Aqmola oblysyna qatysty birqatar shara qabyldady

Vıtse-premer óńirdegi epıdemıologııalyq jaǵdaı boıynsha oblys basshylyǵymen keńes ótkizdi, koronavırýs ınfektsııasynyń ekinshi tolqynyna daıyndyqty qamtamasyz etý jóninde qabyldanyp jatqan sharalar týraly esebin tyńdady.

Premer-Mınıstrdiń orynbasary óńirde tirkelgen SOVID-19 faktileriniń sany aǵymdaǵy jyldyń qazan aıynyń qorytyndysy boıynsha 2,7 esege artqanyn atap ótti.

Eraly Toǵjanov shekteý sharalarynyń saqtalýyn baqylaýdy qamtamasyz etý jónindegi monıtorıngtik toptar qyzmetiniń tıimdiligin atap aıtqanda Kókshetaý, Stepnogor qalalarynda jáne birqatar aýdandarda arttyrý qajettigin aıtty. Vıtse-premer SOVID-19 juqtyrǵandarmen baılanysta bolǵan adamdardy qadaǵalaý jumystaryn kúsheıtý, sondaı-aq PTR zerthanalarynyń múmkindikterin arttyrý máselelerine erekshe nazar aýdardy.

Vedomstvoaralyq komıssııa tóraǵasy epıdemıologııalyq jaǵdaıdy turaqtandyrý maqsatynda 9 qarashadan bastap oblys ákimdigine birqatar shekteý sharalaryn qabyldaýdy tapsyrdy, atap aıtqanda:

Kókshetaý qalasynyń perımetri boıynsha blok beketter ornatýdy;

kún saıynǵy ósimi 10-nan astam jaǵdaıdy quraıtyn eldi mekenderde sanıtarlyq blok beketter ornatýdy;

Kókshetaý-Almaty, Kókshetaý-Aqtaý baǵyttary boıynsha áýe qatynasyn aptasyna 2 reısten 1 reıske deıin qysqartýdy;

Kókshetaý-Qyzylorda baǵyty boıynsha temirjol tasymaldaryn aptasyna 7 retten 3 retke deıin qysqartýdy;

jolaýshylar temir jol quramdarynyń oblys ishinde aıaldaýyna tyıym salýdy (oblys ákimdigi belgilegen jerlerdi qospaǵanda);

dinı obektilerdiń, teatrlardyń, kınoteatrlardyń, mádenıet obektileriniń qyzmetin toqtata turýdy;

jumys kúnderi úı-jaılardaǵy qoǵamdyq tamaqtandyrý obektileriniń jumysyn bir mezgilde 30-dan aspaıtyn kelýshiler bolǵan jaǵdaıda, 30-dan kem oryndyq obektiler úshin eseptik oryndardyń 50%-ynan aspaıtyn jaǵdaıda saǵat 8:00-den 21:00-ge deıin, jumys rejımin qysqarta otyryp shekteýdi;

jumys kúnderi saýda úıleriniń, saýda ortalyqtarynyń, kólemi 500 sharshy metrden astam azyq-túliktik emes dúkenderdiń jumysyn saǵat 10:00-den 20:00-ge deıin shekteýdi;

strategııalyq obektiler men tirshilikti qamtamasyz etý obektileriniń óndiristik protsesti qamtamasyz etetin jumyskerlerin qospaǵanda, oblys eldi mekenderiniń aýmaǵy boıynsha turǵyndardyń qozǵalysyn saǵat 23:00-den saǵat 06:00-ge deıin shekteýdi;

65 jastan asqan adamdarǵa azyq-túlikti, birinshi kezekte qajetti taýarlardy, dári-dármekterdi jáne medıtsınalyq buıymdardy satyp alý jaǵdaılaryn qospaǵanda, asa qajettiliksiz turǵylyqty jerinen shyqpaýdy usynýdy;

qyzmetkerlerdiń keminde 80%-yn qashyqtan jumys isteý rejımine kóshirýdi;

oflaın rejımde keńester ótkizýge tyıym salýdy tapsyrdy.

Jumys sapary barysynda Premer-Mınıstrdiń orynbasary jańa modýldik ınfektsııalyq aýrýhanynyń jáne «Jumyspen qamtýdyń jol kartasy-2020» aıasynda iske asyrylǵan basqa da obektilerdiń jumysymen tanysty.