«Vechernıı Almaty» gazeti 75 jyldyq mereıtoıyn atap ótýde
ATY. 29 sáýir. QazAqparat /Názıra Eleýhan/ - Búgin Almatyda Jambyl atyndaǵy Qazaq memlekettik fılarmonııasynda «Vechernıı Almaty» gazeti 75 jyldyq mereıtoıyn saltanatty túrde atap ótti.
Gazet ujymyn Almaty ákimdiginiń ókilderi, QR Jýrnalıster odaǵy, Qazaqstan jýrnalıster akademııasy, sonymen qatar óner jáne mádenıet qaıratkerleri quttyqtap, júrekjardy tilekterin bildirdi.
«Búginde «Vechernıı Almaty» gazetiniń qazaqstandyq aqparattyq naryǵynda tanymal basylymdardyń biri bolyp tabylatyndyǵyna qýanyshtymyn. Gazettiń taralymy sońǵy úsh jylda eki esege ósti. Bul gazetke kúndelikti basylymdar arasynda kóshbasynda júrýge yqpal etedi. Ol búginde ózge kelbetke ózgerdi, gazet kóptegen almatylyq otbasylardyń keńesshisine aınaldy. Gazet betterinde ár túrli jastaǵy býyn men mamandyqtaǵy adamdardyń, myńdaǵan qazaqstandyqtardyń taǵdyrlary kórinis tapty. 75 jyl boıy gazet Almatynyń damýy men tynys-tirshiligin aıtyp keledi. Almatylyqtar atynan gazetke órkendeý, qyzmetkerlerge - barlyq jaqsylyqty, al oqyrmandarǵa - qyzyqty da ózekti, paıdaly aqparattar tileımin!», - dedi atalmysh sharaǵa arnaıy qatysqan qala ákimi Ahmetjan Esimov.
Gazettiń bas redaktory Nıkolaı Jorovtyń aıtýynsha, «Vechernıı Almaty» gazetiniń 75 jyl ishinde 12 200 nómiri - 300 mıllıon danasy shyqqan. «Biz - bir eldiń azamattarymyz. Qazaq mádenıeti, qazaq tili, qazaq múddesi eń birinshi múdde bolýy kerek. Basylym osy maqsatta qala ómirinde bolyp jatqan barlyq sharalarǵa belsendi aralasyp keledi. Bizdiń bastamamyzben «Altyn qyrǵaýyl», «Baspaldaq», «Kerleng» sharalary turaqty ótkizilip turady. Gazet qalalyq bolǵan soń, onyń betindegi aqparattardyń negizgi 90 paıyzy qala ómirine arnalǵan. Oqyrmandarymyzdyń basym bóligi ejelgi qala turǵyndary. Onyń dini - zııaly azamattar. Taqyrypty usynýshylar da solar. Sondyqtan aıtýly kúnde barsha oqyrmandardy merekelerimen quttyqtap qoıǵym keledi», - dedi ol.
Gazet jaryq kórgennen beri úsh ret ataýyn, birneshe ret formatyn, pishinin, tipti áripteriniń kólemin, túsin de ózgertti. 1936 jyly «Sotsıalıstıcheskaıa Alma-Ata», 1968 jyldan «Vechernıaıa Alma-Ata» bolyp kelse, bertin kele «Vechernıı Almaty» bolyp ózgertildi. Búginde gazet A3 formatynda, aptasyna úsh ret shyǵady. Gazettiń qurylýy men damýyna óz úlesin birneshe júzdegen jýrnalıster men tehnıkalyq qyzmetkerler qosty. Onyń kóbi KSRO jáne QazKSR jýrnalıster Odaǵy syılyǵynyń laýreattary, ár túrli ádebı jáne jýrnalıstik baıqaýlardyń jeńimpazdary, «Mádenıet qaıratkerleri» atandy. Nıkolaı Jorov gazetke basshylyq etip otyrǵan on úshinshi redaktor. Gazet 1936 jyldan shyǵady. 1936-1939 jyldarda gazettiń 830 nómiri ǵana jaryq kóripti. Alǵashqy gazetke eki redaktor basshylyq jasaǵan. Olar - Borıs Berezskıı men Ivan Kırıllıchev.
Shara qazaqstandyq estrada juldyzdarynyń qatysýymen ótken kontserttik baǵdarlamamen aıaqtaldy.
