V Azııa Para oıyndary: Qazaqstan sportshylary besinshi jarys kúninde 16 medal jeńdi

Jarys kúniniń qorytyndysy boıynsha el quramasynyń qorjynynda 16 medal bar. Jalpy júlde sany 37 medalǵa jetti. Onyń ishinde 10 altyn, 11 kúmis jáne 16 qola bar.

Para dzıýdo

Para dzıýdodan el quramasynyń qorjyny taǵy úsh altyn, bir kúmis jáne tórt qola medalmen tolyqty. J2 klasynda + 95 keli salmaq dárejesiniń fınalynda Jurqamyrza Shúkirbekov Iran ókilin jeńip, altyn medal enshiledi. J1 klasynda +70 keli salmaq dárejesinde tatamıge shyqqan Aqtolqyn Seıilbekova barlyq tórt qarsylasyn jeńip, altyn medal ıelendi. J2 klasynda +70 keli salmaqta beldesken Zarına Raıfova da tórt qarsylasynyń barlyǵynan basym túsip, jarys jeńimpazy atandy. Sondaı-aq J2 klasynda — 95 kelige deıingi salmaqta óner kórsetken Janbota Amanjol kúmis medal ıelense, J2 klasynda 95 keli salmaqta beldesken Ermek Nurqabaev jarystyń qola júldegeri atandy. Erlan Ótepov J1 klasynda + 95 keli salmaq dárejesinde tatamıge shyǵyp, qola medal ıelendi. J1 klasy boıynsha + 95 kelide Baǵlanbek Ońalbek qola medal ıelendi. Al J2 klasynda 70 kelige deıingi salmaqta synǵa túsken Aıala Mereke qola medal úshin ótken beldesýde Úndistan sportshysyn jeńip, jarystyń júldegeri atandy.

Para velosporttan eki altyn jáne bir kúmis medal

Qazaqstan ulttyq quramasynyń sportshylary para velosporttan úsh medal jeńip aldy. El qorjyny eki altyn jáne bir kúmis júldemen tolyqty. Erler arasynda B klasynda 20 shaqyrymdyq jeke ýaqytqa jarysýda Naıl Ermýhanbet pen onyń pıloty Rýslan Alıev 34 mınýt 09,17 sekýnd nátıjemen birinshi oryn alyp, Azııa Para oıyndarynyń chempıony atandy. Osy jarysta Kırıll Ilıýkevıch pen onyń pıloty Gleb Brýsenskıı 35 mınýt 26,64 sekýnd nátıjemen kúmis medal jeńip aldy. Áıelder arasynda B klasynda ótken jeke ýaqytqa jarysýda qazaqstandyq Anastasııa Kalaýs pen onyń pıloty Polına Bratchıkova altyn medal ıelendi. Qazaqstandyq ekıpaj 32 mınýt 21,54 sekýnd nátıjemen márege birinshi bolyp jetti. Ekinshi oryndy Ózbekstan sportshylary 32 mınýt 45,82 sekýnd nátıjemen ıelense, Sıngapýr ókilderi 34 mınýt 31,92 sekýnd kórsetkishpen qola júldeger atandy. Osylaısha, Qazaqstan quramasy para velosporttan úsh júlde jeńip alyp, V Azııa Para oıyndaryndaǵy medaldar sanyn arttyrdy.

Cadaq atýdan alǵashqy medal!

Erler arasyndaǵy W1 klasy boıynsha juptyq synda qazaqstandyq sportshylar Temirlan Seıitqamal men Nurshat Tóleýqasym fınalda Qytaı quramasymen kezdesti. Sheshýshi básekede qarsylas komanda 6:0 esebimen jeńiske jetip, Qazaqstan sportshylary kúmis júldeger atandy. Fınaldyq kezdesýdiń úsh seti 37:31, 35:32 jáne 37:35 esebimen Qytaı quramasynyń paıdasyna aıaqtaldy.

Para jeńil atletıka

Para jeńil atletıkadan qos sportshymyz júldeger atandy. Uzyndyqqa sekirýden (T13 klasy) Islam Salımov 6,30 metr nátıjemen saıystyń kúmis júldegeri atandy. Japonııa sportshysy Reta Fýnagaga 6,93 metr nátıjemen jeńimpaz bolsa, Ózbekstan ókili Batyr Muhamedov 6,24 metr kórsetkishpen qola medal jeńip aldy. Al ıadro ıterý saıysynda (F53 klasy) Mahambet Serikqalıev 6,81 metr nátıjemen qola medal jeńip alyp, jeke rekordyn jańartty. Bul synda Úndistan sportshysy A. Verma (8,16 m) altyn, Iran ókili A. Hemamı (8,09 m) kúmis medal ıelendi. Dısk laqtyrýdan (F11) Svetlana Irjanova altynshy orynǵa turaqtasa, ıadro ıterýden (F46 klasy) Ravıl Mansýrbaev tórtinshi orynǵa jaıǵasty. Naıza laqtyrýdan F55 klasynda óner kórsetken Muqan Aıtmyrzaev besinshi orynda. Al 100 metrge júgirýden T62 klasc arasynda Aısulý Súleımenova 16.18 nátıjesimen Azııa rekordyn ornatty.

Para júzý

Álı Turǵanbekov 100 metrge brass ádisimen júzýden kúmis júldeger atandy. SB4 sanatyndaǵy fınaldyq jarysta otandasymyz 1:44.26 sekýnd nátıje kórsetip, ekinshi orynǵa ıe boldy.

Al S10 sanatynda 100 metrge batterflıaı ádisimen júzýden ótken fınalda Dıas Kenjebek 1:05.50 sekýnd nátıje kórsetip, qola medal ıelendi. S8 sanatynda 100 metrge erkin stılde júzýden ótken fınalda Alına Dýbınına qashyqtyqty 1:23.69 sekýndta júzip ótip, besinshi orynǵa turaqtady. Al áıelder arasynda S8 sanatynda 50 metrge erkin stılde júzýden ótken fınaldyq jarysta ol 38.20 sekýnd nátıje kórsetip, besinshi oryn aldy. SB11 sanatynda 100 metrge brass ádisimen júzýden ótken fınalda Roman Potapov pen Ámir Muratbekov baq synady. Roman Potapov 1:20.89 sekýnd nátıjesimen tórtinshi orynǵa turaqtasa, Ámir Muratbekov 1:22.25 sekýnd kórsetkishimen besinshi orynǵa ıe boldy. S5 sanatynda 200 metrge erkin stılde júzýden ótken fınalda Aısýltan Kúlkaev 3:14.40 sekýnd nátıje kórsetip, besinshi oryn aldy. Áıelder arasynda SB5 sanatynda 100 metrge brass ádisimen júzýden ótken fınalda Zarına Mýrzagalıeva 2:30.80 sekýnd nátıjesimen jetinshi orynǵa turaqtady. Erler arasynda SB5 sanatynda 100 metrge brass ádisimen júzýden ótken fınalda Bekasyl Qasymbek 2:07.44 sekýnd nátıje kórsetip, besinshi orynǵa ıe boldy. SM11 sanatynda 200 metrge keshendi júzýden ótken erler arasyndaǵy fınalda Nurdáýlet Dúısenbaev 2:53.94 sekýnd nátıjesimen besinshi orynǵa turaqtady.

Para paýerlıftıng

Áıelder arasynda 73 kelige deıingi salmaqta Raýshan Qoıshybaeva 113 keli nátıjemen tórtinshi oryn ıelendi. Al erler arasynda 88 kelige deıingi salmaqta Rahmetjan Hamaev 206 keli kóterip, besinshi orynǵa turaqtady. Sondaı-aq erler arasynda 97 kelige deıingi salmaqta Ádiljan Baýtov 204 keli nátıjemen besinshi oryn aldy. Osy salmaqta el namysyn qorǵaǵan Ashat Jumanov 180 keli kórsetkishpen segizinshi orynǵa jaıǵasty.

Para taekvondo

Para taevondodan K44 klasy boıynsha 80 kelige deıingi salmaqta óner kórsetken Nurlan Dombaev alǵashqy jekpe-jeginde japonııalyq Chıkara Itody jeńip, jartylaı fınalǵa joldama alǵan edi. Alaıda jartylaı fınalda koreıalyq Chjý Chonhymge 0:2 esebimen ese jiberdi. Al qola medal úshin jekpe-jekte qarsylasyna jol berdi. K44 klasynda +80 keli salmaqta synǵa túsken Janbolat Kazıev jubanysh jekpe-jeginde Irak ókili Shad Hoshnavqa 2:1 esebimen jol berdi. K44 klasynda +65 keli salmaqta synǵa túsken Aıkenje Dáýletshına jubanysh jekpe-jeginde Iran ókilinen ese jiberip, jarysty aıaqtady.

Voleıboldy otyryp oınaý

Voleıboldy otyryp oınaýdan ulttyq komanda sportshylary toptyq kezeńde Iran komandasymen baq synasty. Kezdesý nátıjesiniń qorytyndysy boıynsha, el quramasy qarsylastaryna 3:0 esebimen jol berdi. Osyǵan deıin ulttyq komanda Taıland komandasymen kezdesip, jarys jolyn jeńispen bastaǵan edi.

Para ústel tennısi

Áıelder arasyndaǵy juptyq synda Arýjan Ǵınııatova men Raýshan Orynbaeva Gonkong ókilderine 0:3 esebimen ese jiberdi. Al Altynaı Erjanqyzy men Balzııa Tash Japonııa sportshylaryna 1:3 esebimen jol berdi. Aralas juptyq saıysta Álı Mahýlbekov pen Balzııa Tash Japonııa quramasynan 0:3 esebimen jeńildi. Raýshan Orynbaeva men Igor Hýdıakov Ońtústik Koreıa ókilderine 1:3, al Qytaı sportshylaryna 0:3 esebimen ese jiberdi. Álı Mahýlbekov pen Balzııa Tash Indonezııa jubynan 0:3 esebimen utyldy.

Arýjan Ǵınııatova men Azamat Orazbek Taıland sportshylaryna 0:3 esebimen jol berse, Gonkong ókilderimen kezdesýde 2:3 esebimen jeńildi. Ardaq Nurmaǵambetov pen Aleksandra Stepanova Japonııa jáne Ońtústik Koreıa juptaryna 1:3 jáne 0:3 esebimen ese jiberdi. Marat Sýrtýbaev pen Altynaı Erjanqyzy Qytaı sportshylarynan 1:3 esebimen jeńilgenimen, Indonezııa jubyn 3:1, Japonııa ókilderin 3:2 esebimen utty. Erler arasyndaǵy juptyq synda Marat Sýrtýbaev pen Talǵat Erekeev Gonkong sportshylaryna 1:3 esebimen ese jiberdi. Igor Hýdıakov pen Azamat Orazbek Qytaı jubynan 0:3, al Fılıppın ókilderinen 1:3 esebimen jeńildi.