Vaıner Meıirhan Shernııazov merziminen buryn bosap shyǵa ma

ALMATY. KAZINFORM – Túrksib aýdandyq sotynda Mudarabah Capital qarjy pıramıdasyn qurý isi boıynsha bes jylǵa sottalǵan belgili vaıner Meıirhan Shernııazovtyń merziminen buryn bosatý týraly ótinishi qaraldy.

Sotta Shernııazovty Almaty qalasy Almaly aýdandyq sotynyń 2023 jylǵy 23 maýsymdaǵy úkimimen Qylmystyq kodekstiń 217-babynyń 3-bóliginiń 2-tarmaǵy (qarjy pıramıdasyn qurý jáne basqarý) boıynsha 5 jylǵa bas bostandyǵynan aıyrý jazasy taǵaıyndalǵany anyqtaldy.

Azamattyq talaptyń jalpy somasy 814 120 806 teńge, memlekettik baj túrindegi sot shyǵyndary 8 045 602 teńge.

Sottalýshymen 15 000 teńge kóleminde memlekettik baj jáne Jábirlenýshilerge ótemaqy qoryna 58 340 teńge májbúrli tólem ótelgen.

Sot talqylaýy barysynda sottalǵannyń jazasyn neǵurlym jeńil jazamen aýystyrý týraly ótinish hatty qanaǵattandyrýdyń negizgi krıterııleriniń biri zııannyń ótelmegeni de anyqtaldy.

QRQK-niń 73-babynyń 1-bóligine sáıkes, onsha aýyr emes, aýyrlyǵy ortasha nemese aýyr qylmys úshin bas bostandyǵynan aıyrýdy ótep jatqan adamǵa, ol qylmyspen keltirilgen zalaldy tolyq ótegen ne jazany óteýdiń belgilengen tártibin qas kóılikpen buzbaǵan jaǵdaıda, sot jazanyń qalǵan ótelmegen bóligin neǵurlym jeńil jaza túrimen aýystyrýy múmkin.

– Barlyq mán-jaılardy eskere otyryp, sot M.Shernııazovtyń jeke isiniń materıaldaryn jan-jaqty zerttep, sot qaýlysymen ótinish hatty qanaǵattandyrýsyz qaldyrdy, – dep habarlady sottan.

Qaýly zańdy kúshine engen joq.

Aıta keteıik, Túrksib aýdandyq soty 25 jeltoqsan kúni Meıirjan Tórebaevtyń da ótinishin qanaǵattandyrmady.

Osyǵan deıin, vaınerler sotqa merziminen buryn bosatý týraly ótinishpen júgingen edi. 

Buǵan deıin Pavlodar oblysynyń № 44 mekemesinde jazasyn ótep jatqan, Meıirjan Tórebaev pen Meıirhan Shernııazovtyń Almatydaǵy kolonııaǵa aýystyrylǵany týraly jazǵan edik. 

Eske salaıyq, byltyr maýsym aıynda Almatyda Mudarabah Capital qarjy pıramıdasyn qurý isi boıynsha sot úkimi shyqqan bolatyn. Atalǵan is boıynsha vaınerler Meıirjan Tórebaev pen Meıirjan Shernııazov 5 jylǵa sottaldy. 

Sondaı-aq, qarjy pıramıdasyn qurdy dep sottalǵan Meıirjan Tórebaevtyń áıeli Dana Eseeva áleýmettik jelide kúıeýi men balalarynyń vıdeosyn jarııalaǵanyn jazǵanbyz. https://kaz.inform.kz/news/bes-zhilga-sottalgan-vayner-meyrzhan-torebaev-uyne-keld-016717/

Keıin Pavlodar oblysy qylmystyq-atqarý júıesi departamenti sottalýshy Meıirjan Tórebaevtyń nege úıine jiberilgenin túsindirdi.

Osy jyldyń basynda vaınerler Meıirjan Tórebaev pen Meıirhan Shernııazov sotqa apelıatsııalyq shaǵym túsirdi. 

Alaıda apellıatsııalyq sot vaınerlerge qatysty úkimdi ózgerissiz qaldyrdy.