Vatıkannyń qupııa muraǵattarynan Qazaqstannyń belgisiz kartalary tabyldy
ASTANA. QazAqparat - Kóp jyldan beri Ál-Farabı atyndaǵy Qazaq ulttyq ýnıversıtetimen birlesip jumys jasap kele jatqan Kolýmbııa ýnıversıtetiniń tarıhshysy Rafıs Abazov Vatıkannyń qupııa muraǵattarynan Qazaqstannyń belgisiz kartalaryn tapty, dep habarlady Zakon.kz.
Rafıs Abazov «Rım jáne Alash: mádenı mura» ǵylymı jobasynyń aıasynda muraǵattardy zertteýge shaqyrylǵan bolatyn.
Bul jobany Júrgenov atyndaǵy Qazaq ulttyq óner akademııasynyń rektory, PhD doktor Andreı Hazbolatov jáne «Italııa» bilim berý ortalyǵynyń dırektory, ıtalıan tilin oqytýshy Karmıne Barbaro birlese júzege asyrylǵan.
Ǵalymdar Reseı ımperııasynyń Eýrazııanyń kóshpeli taıpalarymen, sonyń ishinde qazaqtarmen ózara baılanysyna qatysty dálelder tabýǵa úmittendi. Qupııa muraǵattardy zertteý kezinde Qazaqstan aýmaǵyna qatysty kartalar tabyldy.
«Menińshe, bul tabylǵan derekter Qazaq memlekettiliginiń naqty genezısi men damý dınamıkasyn túsinýge kómektesedi. Qazirgi qazaq memlekettiligi 16-17 ǵasyrlarda paıda boldy dep sanalady jáne tarıhshylarda sol kezdegi qazaq taıpalarynyń syrtqy álemmen baılanysy jaıly málimet az. Sonymen birge, ǵalymdar olardyń Qytaı jáne Reseımen qarym-qatynasyna erekshe nazar aýdarady. Alaıda bul kartalar qazaq halqynyń bıleýshileri syrtqy álemmen baılanysty keńinen ornatýy, Ońtústik Azııa , tipti Batys Eýropaǵa deıin baılanys jasaýy múmkin ekenin aıǵaqtaıdy», - deıdi Abazov.
Vatıkannyń qupııa muraǵattaryna ruqsat alý ońaı emes, Abazovtyń qujattarmen jumys isteýge ruqsat alý úshin bir jyl kútýine týra kelgen. Tabylǵan kartalar shamamen 16-17 ǵasyrlarǵa tıesili. Sonymen birge, ǵalym Rım papasynyń tatar-mońǵoldardyń hanyna jazǵan hattaryn tapty.
