Vatıkanda Rım Papasy Lev XIV ınaýgýratsııalyq messa rásimi ótti
ASTANA. KAZINFORM — Katolık áleminiń nazary Vatıkanda ótip jatqan Rım Papasy Lev XIV saltanatty ınaýgýratsııalyq messa rásimine aýyp otyr, dep habarlaıdy Kazinform tilshisi.
Saltanat shara Áýlıe Petr alańynda ótip jatyr. Rásim bastalar aldynda jańa pontıfık ashyq kólikte (papamobılde) alańdy aınalyp ótip, jınalǵan halyqty qarsy aldy. Vatıkan bıliginiń boljamy boıynsha, alańǵa shamamen 250 myń adam jınalǵan.
Jańa elektrli papamobıl
Jańa Papa kóligin Germanııanyń Mercedes kontserni arnaıy daıyndaǵan. Mercedes-Benz G580 EQ elektr úlgisi negizinde jasalǵan papamobıl Vatıkannyń erekshe talaptaryna beıimdelip jasalǵan.
Papa Lev XIV Áýlıe Petr alańyn tolyqtaı júrip ótip, senýshiler ony qoshemetimen qarsy aldy. Ol birneshe ret toqtap, jańa týǵan sábılerdi batasyn berip úlgerdi.
Vıa della Konchılıatsıone men sobor aldyndaǵy saltanat
Keıin papamobıl Vıa della Konchılıatsıone kóshesine shyqty. Bul kóshe de myńdaǵan adamǵa toldy. Pontıfık kósheni sońyna deıin júrip ótip, keıin keri burylyp, Áýlıe Petr soboryna bet aldy.
Papalyq bılik rámizderin qabyldaý
Rásim barysynda Rım Papasy Lev XIV papalyq bıliktiń eki negizgi rámizin — «balyqshynyń júzigin» jáne pallıııdi (krestpen kestelengen júnnen jasalǵan lenta) qabyldap, resmı túrde óz qyzmetine kiristi.
Halyqaralyq qatysýshylar
Saltanatty sharany sheteldik joǵary laýazymdy qonaqtar tamashalady. Olardyń qatarynda — AQSh vıtse-prezıdenti Djeı Dı Vens jáne Eýropa komıssııasynyń tóraıymy Ýrsýla fon der Lıaıen bar.
Rım ýaqytymen saǵat 15:30-da úshjaqty kezdesý ótedi — Vens, fon der Lıaıen jáne Italııa premer-mınıstri Djordja Melonı halyqaralyq kún tártibi men AQSh-EO qatynastary jaıyn talqylaıdy.
Buǵan deıin Rım Papasy Lev XIV balalyq shaǵy ótken Chıkagodaǵy úı $250 myńǵa aýktsıonǵa shyǵarylǵany anyqtaldy.