Vatıkan júz jyl boıy saqtaǵan kanadalyq úndisterdiń eksponattaryn qaıtaryp berdi
ASTANA. KAZINFORM — Rım papasy Lev XIV Kanadanyń katolık epıskoptarynyń konferentsııasy ókilderine kanadalyq úndisterge tıesili mádenı qundylyqtardy qaıtardy, dep Vatıkan baspasóz qyzmetine siltemeı jasaı otyryp TASS agenttigi jazdy.
Baspasóz qyzmetiniń habarlamasynda:
— Aýdıentsııa barysynda Papa Vatıkan mýzeıiniń etnologııalyq kollektsııasynan 62 artefaktty konferentsııaǵa tapsyrdy, — delingen.
Bul eksponattar 1923–1925 jyldar aralyǵynda katolık mıssıonerleri arqyly Rımge ákelingen. 1925 jyly olar Vatıkan mýzeıine ornalastyrylyp, shamamen bir ǵasyr boıy saqtalǵan.
2024 jyly qazan aıynda The Globe and Mail gazeti Ottava men Rımdegi derekkózderge silteme jasap, Papanyń kanadalyq úndisterdiń mádenı qundylyqtaryn katolıktik Rojdestvoǵa deıin Kanadaǵa qaıtarý nıeti týraly habarlaǵan edi.
Kanadalyq úndister bul qundylyqtardy otanyna qaıtarýǵa jyldar boıy tyrysqan, biraq sátsiz qadam bolǵan edi.
Jaǵdaı tek 2021 jyly ózgerdi: Kanadada buryn Rım-katolık shirkeýiniń qaraýyna kirgen úsh úndis balalar ınternaty aýmaǵynda myńnan astam aty-jóni belgisiz kishkentaı balalardyń qabiri tabyldy. Bul jańalyq qoǵamdy dúr silkindirip, bılikten mektep aýmaǵyn qazýǵa ruqsat suraldy. Sol kezde Rım-katolık shirkeýinen kanadalyq úndisterden resmı keshirim suraý usynyldy, sol kezdegi premer-mınıstr Djastın Trıýdo da ún qosty.
2022 jyly Papa Frantsısk arnaıy kanadalyq ınternattardaǵy balalarǵa qatygezdik kórsetkeni úshin resmı keshirim suraıtynyn jarııalady. Al 2024 jyly Djastın Trıýdo Vatıkanǵa sapary kezinde Papadan kanadalyq úndisterge tıesili mádenı qundylyqtardy qaıtarýdy suraǵan bolatyn.
Aıta keteıik, qyrkúıekte Vatıkandaǵy Áýlıe Petr alańynda alǵash ret estradalyq kontsert ótip, Eýropadaǵy eń úlken dron shoýy uıymdastyryldy.