Vatıkan tuńǵysh ret «Oskar» júldesine úmitker bolmaq
ASTANA. KAZINFORM — Vatıkan 97 jyldyq tarıhy bar «Oskar» syılyǵyna tuńǵysh ret fılm usynbaq. Bul týraly Kazinform agenttigi Variety basylymyna silteme jasap habarlaıdy.
Vatıkannyń qoldaýymen túsirilgen «Jasyl lava» (Green Lava) derekti fılmi osy aptada Los-Andjeleste kórermenge jol tartady. Týyndy «Úzdik qysqametrajdy derekti fılm» nomınatsııasy boıynsha «Oskarǵa» usynylýǵa daıyndalyp jatyr.
Fılm Dıýshenn bulshyqet dıstrofııasyna shaldyqqan ıtalııalyq jas jigit Djakomo Mattıvıdiń ómirin sýretteıdi.
— Djakomo qoǵamnyń qalyptasqan túsinigine qaramastan, ózine qoıǵan shekteýlerge qarsy turady. Ol ortasynan jáne tabıǵattan kúsh alady, — delingen fılm sıpattamasynda.
Dolomıt taýlarynyń ásem tabıǵatynda túsirilgen 39 mınýttyq fılm jarnamalyq materıaldarda «qaısar nıet, adam rýhy men senimdi tirek» dep sıpattalady.
Fılm «Oskarǵa» usynylsa, Vatıkan túsirgen týyndy tarıhta alǵash ret osy júldege úmitker bolady. Alaıda «Jasyl lava» (Green Lava) júldede Vatıkannyń jeke atynan túspeıdi. Sebebi qysqametrajdy fılmder sanatyna el úkimeti nemese arnaıy komıtettiń resmı ótinimi men maquldaýy talap etilmeıdi.
Buǵan deıin Qazaqstanda memlekettik qoldaýmen jaryq kórgen fılmderden 351 mln teńge kiris túskeni habarlanǵan bolatyn.
Aqzat Jıenalına
