Vatıkan Rım papasynyń aýrýhanaǵa túskennen keıingi alǵashqy fotosýretin jarııalady

ASTANA. KAZINFORM – Sýrette pontıfık pnevmonııadan emdelip jatqan Rımdegi Gemelli aýrýhanasyna qarasty kishkentaı shirkeýde jyljymaly oryndyqta otyr, dep habarlaıdy VVS.

Vatıkan Rım Papasy Frantsısk bir aıdan astam ýaqyt buryn Rımdegi aýrýhanaǵa túskennen beri onyń alǵashqy sýretin jarııalady.

Juma kúni Rım Papasy Angelus jazbasha joldaýyn taratyp, onda «synaq kezeńinen» ótip jatqanyn moıyndady, jaqsy tilekter úshin alǵys bildirdi jáne «soǵys jaralap jatqan elder: Ýkraına, Palestına, Izraıl, Lıvan, Mıanma, Sýdan jáne Kongo Demokratııalyq Respýblıkasynda» beıbitshilik úshin duǵa etkenin aıtty.

Rım Papasy jeksenbilik duǵaǵa jeke qatysa almaı júrgeninen qatarynan besinshi apta boldy. Vatıkannyń buǵan deıin habarlaýynsha, rentgenmen túsirilgen sýretter onyń jaǵdaıynyń «birtindep jaqsarǵanyn» kórsetkenimen, oǵan áli de aýrýhanada kútim qajet bolyp otyr.

- Áýlıe Áke áli de aýrýhanada emdik terapııany, motorlyq jáne respıratorlyq fızıoterapııany qajet etedi, - delingen Papanyń jaǵdaıy týraly senbilik bıýlletende.

Rım Papasy Frantsısk 88 jasta. Ol 14 aqpannan beri kópshilik aldyna shyqpaǵan. Osy ýaqyt ishinde búgingi kúnge deıin onyń birde-bir fotosýreti jarııalanǵan joq.

Onyń qos pnevmonııa jáne basqa da ınfektsııalarǵa shaldyqqany habarlandy.

10 naýryzda Rım papasy Frantsısktiń dárigerleri onyń densaýlyǵyna qatysty boljamdy jaqsartqanyn jazǵan bolatynbyz.