Vatıkan elshisi Rım Papasynyń Qazaqstanǵa sapary týraly aıtty

NUR-SULTAN. QazAqparat – Vatıkannyń Apostoldyq Nýntsııi, Vatıkan elshisi Frensıs Assızı Chýllıkat Rım Papasynyń Qazaqstanǵa saparynyń mán-jaıyn bólisti jáne dıplomattardy qasıetti Messaǵa shaqyrdy, dep habarlaıdy QazAqparat tilshisi.

Óz sózinde Vatıkan elshisi Qasym-Jomart Toqaevtyń batyl sóz sóılegenin, ol jarııalaǵan reformalar baǵdarlamasy kóńil bólýge turarlyq ekenin atap ótti.

«Rım Papasynyń Qazaqstanǵa sapary qyzyqtyrsa, egjeı-tegjeıin aıtaıyn. Ol 12 qyrkúıekte keledi, Qazaqstan kontsert zalynda dıplomatııalyq korpýs pen azamattyq qoǵam ókilderiniń aldynda sóz sóıleıdi. 14 qyrkúıekte elordada Álemdik jáne dástúrli dinder lıderleriniń sezi ótedi, onda Rım Papasy da sóz sóıleıdi. Kúnniń ekinshi jartysynda Messa ótedi. Bul - biz ótkizetin qasıetti rásimderdiń biri. Ázirge bizdiń tizimde myńǵa jýyq adam bar, shamamen 6-10 myń adam keledi dep boljap otyrmyz. Rım Papasy óz saparynyń sońǵy kúni sezdiń jabylý saltanatynda sóz sóıleıdi. Basqa da ózekti aqparatty QR Syrtqy ister mınıstrliginiń protokoldyq keńsesi arqyly bilýge bolady», - dedi Frensıs Assızı Chýllıkat.

Sonymen birge, Vatıkannyń Apostoldyq Nýntsııi dıplomatııalyq korpýstyń Rım Papasymen ótetin qasıetti Messaǵa shaqyrylatynyn aıtty.

Keptelister men basqa da problemalardy boldyrmas úshin dıplomatııalyq korpýsqa Syrtqy ister mınıstrligi ǵımaratynan qasıetti massaǵa deıin kólik beriledi.

Eske sala ketsek, 12-14 qyrkúıek kúnderi Nur-Sultanda Álemdik jáne dástúrli dinder kóshbasshylarynyń VII sezi ótedi.

Rım Papasy Frantsısk Sezge kelý sapary aıasynda ashyq aspan astynda Messa rásimin ótkizedi.

Shara 14 qyrkúıek kúni saǵat 16:45-te Máńgilik El dańǵyly, B1 meken-jaıynda (Nur Alem pavılony aldyndaǵy alań - EXPO halyqaralyq kórme ortalyǵynyń aýmaǵy, stellanyń janynda) ótedi. Kirý tegin.