Vasılıı Jırov Danııar Eleýsinovtiń qarsylasyn nege nokaýtqa túsirmegendigin aıtty

ASTANA. QazAqparat - 1996 jylǵy Atlanta Olımpıadasynyń chempıony jáne IBF nusqasy boıynsha birinshi aýyr salmaqtaǵy álemniń eks-chempıony Vasılıı Jırov «SPORTINFORM» SAA-ǵa Danııar Eleýsinovtiń kásibı rıngtegi ekinshi jekpe-jeginde majarlyq Zoltan Shebony nokaýtqa jibere almaýynyń sebebin túsindirdi.

«Ádette, qarsylasyńdy nokaýtqa jiberemin dep aldyńa maqsat qoıyp, tek sol týraly oılasań ol bolmaı qalady. Óıtkeni qarsylasyń seniń umtylysyńdy kórip, barynsha qorǵanýǵa tyrysady. Sondyqtan nokaýtty daıyndaý kerek, qarsylasyńdy aldap baryp, myqty soqqyny ol kútpegen jerden jasaý kerek. Onyń ústine orta salmaqta nokaýt óte sırek kezdesedi. Danııarǵa jáne barlyq boksshylarǵa jekpe-jekte sáttilik pen tózimdilik tileımin!»,-dedi Jırov.

Eske sala keteıik, 6 maýsymnan 7 maýsymǵa qaraǵan túni Rıo-2016 Olımpıadasynyń chempıony Danııar Eleýsinov majarlyq Zoltan Shaboǵa qarsy londondyq York Hall-da kásibı rıngte ekinshi jekpe-jegin ótkizdi.

Barlyǵy 6 raýnd boldy. Solardyń nátıjesi boıynsha jeńiske qazaqstandyq boksshy jetken. Dál osy kezdesýden keıin Eleýsinovtiń prodıýseri jerlesimizdiń kelesi kezdesýiniń ótetin orny men ýaqytyn atap ketti. Danııar jankúıerlerine qoldaý tanytqandary úshin alǵys bildirdi.