Vasılıı Levıt jaraqatyna baılanysty WSB fınalyna qatysa almaıdy
ASTANA. QazAqparat - «Astana Arlans» komandasynyń 91 keli salmaq dárejesindegi sportshysy Vasılıı Levıt Dúnıejúzilik boks serııasynyń fınalyna qatysa almaıdy, dep habarlaıdy Sports.kz .
Sport portalynyń habarlaýynsha, Levıt jaraqat alǵan, onyń qolynda synyq jaraqaty bar, qazir sportshy gıpspen júr.
Aıta keterligi, «Cuba Domadores» klýbyna qarsy aıqasta Levıt týrnırdiń sońǵy eki jekpe-jeginde utylyp qalǵan Anton Pınchýktiń ornyna shyǵýy kerek bolatyn.
Eske sala ketsek, Búkilálemdik boks serııasy (WSB) VII maýsymyndaǵy «Astana arlandary» men «Kýba qabylandary» arasyndaǵy fınaldyq jekpe-jek 15 shildede Astanadaǵy «Qazaqstan» sport kesheninde ótedi . Fınaldyq kezdesýlerdiń barlyǵy da bir kúnde ótedi dep josparlanýda.
«Astana arlandary» 2013 jáne 2015 jyldary chempıon atandy. Al alǵashqy 2011 jyly fınalda Frantsııa boksshylaryna bir ǵana esep aıyrmashylyǵymen ese jiberip, kúmis medaldi qanjyǵaǵa baılady. 2012, 2014 jáne 2016 jyldary úzdik úshtikti túıindep, qola medalǵa qol jetkizgen bolatyn.
