Vasılıı Levıt pen Bahtııar Artaev memlekettik qyzmetshi bolmaq
ASTANA. QazAqparat - Bıyl Qaztutynýodaǵy Qaraǵandy ekonomıkalyq ýnıversıtetiniń (QEÝ) magıstratýrasyna «juldyzdy» top oqýǵa tústi. Olardyń qatarynda ataqty sportshylar men aıtyskerler bar, dep habarlaıdy QazAqparat Qaraǵandy oblysy ákimdigine silteme jasap.
Atap aıtqanda, «kedendik qyzmet» mamandyǵy boıynsha QEÝ magıstratýrasyna Olımpıada oıyndarynyń júldegeri Vasılıı Levıt tústi. Sonymen qatar atalmysh joǵary oqý ornynda belgili boksshy, Olımpıada chempıony Bahtııar Artaev ta oqıtyn bolady. Ol «memlekettik jáne jergilikti basqarý» mamandyǵyn tańdaǵan. Al ataqty aıtysker Dıdar Kámıev «quqyqtaný» boıynsha bilimin jetildirmek.
Barlyǵy memlekettik grant negizinde tegin oqıtyn bolady.
«Men Serik Sápıevtiń izin qýyp, osynda tústim. Ol osy ýnıversıtette oqıdy. Birinshi alǵan joǵary bilimim - zańger, ekinshisinde kedendik qyzmetti tańdadym. Keleshekte ómirimdi osy mamandyqpen baılanystyrýym ábden múmkin», - dedi Vasılıı Levıt.
Aıta keteıik, osyǵan deıin Vasılıı Levıt QEÝ-de qonaq retinde bolyp, stýdenttermen kezdesti, olarǵa sheberlik sabaqtaryn berdi. Ýnıversıtet óziniń sporttyq bazasymen tanymal.
Olıpıada chempıony, Vel Barker Kýbogynyń ıegeri, búginde QR Parlamenti Májilisiniń depýtaty Serik Sápıev eki joǵary bilimge ıe. Ol E.A. Bóketov atyndaǵy Qaraǵandy memlekettik ýnıversıtetin «dene shynyqtyrý pedagogy», «quqyqtaný» mamandyqtary boıynsha támamdaǵan. Sonan soń Qaraǵandy memlpekettik tehnıkalyq ýnıversıtetinde «taý ken isi» mamandyǵy boıynsha dıplom alǵan. «Sporttyq menedjer» mamandyǵy boıynsha «Bolashaq» baǵdarlamasynyń stıpendıanty boldy. Qazirgi tańda Serik Sápıev «memlekettik jáne jergilikti basqarý» mamandyǵy boıynsha QEÝ-niń bakalavrıatynda bilim alýda.
Bıylǵy jyly QEÝ-ge, sonymen qatar ulttyq qurama músheleri men sport sheberleri de túsken. Olardyń qatarynda mını-fýtbol boıynsha Qazaqstannyń úsh dúrkin chempıony Vladıslav Chernomordov, qazaq kúresi boıynsha elimizdiń jastar quramasynyń múshesi Serjan Beısenbaev jáne bıatlonnan ıýnıorlar arasynda elimizdiń eki dúrkin chempıony, Olımpıada quramasyna úmitker eń jas sportshy Vıktorııa Kataeva bar.
