Vasılıı Levıt pen Ádilbek Nııazymbetovke olımpıada syıaqysy tabystalatyn kún anyqtaldy
ASTANA. QazAqparat - Ulttyq olımpıada komıteti (UOK) Rıo Olımpıadasynyń kúmis júldegerleri Vasılıı Levıt pen Ádilbek Nııazymbetovke «altynǵa» para-par syıaqyny tabystamaq, dep habarlaıdy QazAqparat tilshisi Qazaqstan boks federatsııasynyń baspasóz qyzmetine silteme jasap.
«Vasılıı Levıt pen Ádilbek Nııazymbetovke «altynǵa» beriletin olımpıadalyq syıaqyny tabystaý rásimi Astanada 8 jeltoqsanda ótedi. Bizdiń sportshylar asqan sheberlik, moıymas qaırat pen barsha álemge naǵyz olımpıadalyq rýh tanyta bildi», - delingen QBF habarlamasynda.
Este bolsa, Rıo-de-Janeıro Olımpıadasynda Vasılıı Levıt pen Ádilbek Nııazymbetov kúmis medaldar oljalaǵan bolatyn. Alaıda 2016 jyly 26 tamyzda bizdiń olımpıadashylardy qurmetteý saltanatynda Qazaqstan Prezıdenti Nursultan Nazarbaev Vasılıı Levıt pen Ádilbek Nııazymbetovtiń eńbegin joǵary baǵalap, olarǵa altyn medal úshin beriletin syıaqyny berý týraly sheshim jasady.
«Memleket basshysynyń 23 qarashasyndaǵy tapsyrmasyn oryndaý maqsatynda Ulttyq olımpıada komıteti Vasılıı Levıt pen Ádilbek Nııazymbetovke «altynǵa» para-par syıaqyny tabystaıdy», - dep jazady QBF.
Esterińizge sala keteıik, 91 keli salmaq dárejesi boıynsha bokstan olımpıadalyq týrnırdiń aqtyq aıqasynda tóreshiler jeńisti reseılik Evgenıı Tışenkoǵa bergen bolatyn. Tóreshilerdiń bul sheshimine tek qazaqstandyq jankúıerler ǵana emes, álemniń boks súıer jankúıerleriniń basym bóligi, sonyń ishinde Reseıdiń biraz jankúıerleri narazylyq tanytqan bolatyn.
Sheteldik birqatar basylym da osy aqtyq aıqasta Vasılıı Levıttiń ústem bolǵanyn jazdy. Osylaısha, Levıttiń kúmisi altynmen para-par boldy. Buǵan dálel Qazaqstan boks federatsııasy olımpıada «kúmisine» beriletin memlekettik syıaqy 100 myń dollardyń ústine 150 myń dollar qosyp, bul somany olımpıadalyq «altynmen» teńestirdi.
