Vasılıı Levıt kýbalyq boksshydan jeńilip qaldy
ASTANA. QazAqparat - Bokstan álem chempıonatynda 91 kelige deıingi salmaqta Qazaqstannyń namysyn qorǵaýǵa barǵan qazaqstandyq boksshy Vasılıı Levıt kýbalyq Erıslandı Seıvonnan 3:1 esebimen jeńilip qaldy, dep habarlaıdy «QazAqparat» HAA tilshisi.
Erıslandı Seıvonnyń qarqyny men Vasılıı Levıttiń ekpini sharshy alańda naǵyz kórikti boksty kórsete bildi. Mamandar dál bul kezdesýde Levıtke kýbalyqtyń aıtarlyqtaı qarsylyq kórsetkenin aıtady. Buǵan deıin qazaqstandyq boksshynyń qarqynyna qarsylastardyń kóbi «qoǵadaı japyrylǵan». Alǵashqy kezdesý teń deńgeıde órbigenimen Levıttiń ekinshi raýndtaǵy sol qolymen jasaǵan soqqylary Seıvondy qalbalaqtata túsken edi. Kýbalyqtyń boıy Levıtten 7 santımetr uzyn bolǵanyna qaramastan, otandasymyzdyń tájirıbesi qarsylasyn tyrp etkizgen joq. Levıt qashyqtyqty saqtaı otyryp, upaıyn túgendep alǵandaı bolyp júrgen. Alaıda tóreshilerdiń sheshimimen jeńis kýbalyqqa berildi.
Eske sala ketsek, Germanııanyń Gambýrg qalasynda bokstan ótip jatqan álem chempıonatynda osyǵan deıin qazaqstandyq Qaırat Eralıev (56 kelige deıingi salmaq) pen Ábilhan Amanqul (75 kelige deıingi salmaq) fınalǵa joldama alsa, 49 kelige deıingi salmaqta Jomart Erjan qola júlde ıelengen bolatyn.
