Vasılıı Levıt kásipqoı boks, Golovkın, Savon týraly aıtty
ASTANA. QazAqparat - Astanada ótken Boks kúni sharasyna kelgen Rıo Olımpıadasynyń kúmis júldegeri Vasılıı Levıt jýyq arada qaıta jattyǵýǵa kirisetinin málimdedi, dep habarlaıdy «QazAqparat» HAA tilshisi.
«Kóńil-kúıim jaqsy. Erteńnen bastap jattyǵýǵa kirisemin. El chempıonatyna qatyspaımyn. Ózindik sebebim bar. Sońǵy Álem chempıonatynda ekinshi aıqastan keıin qolymdy syndyryp alǵandyqtan, jarany jazý kerek. Búginge deıin ońaltý kýrsynan ótip, jýyq arada tolyqqandy jattyǵýǵa kirisemin», - deıdi boksshy.
Levıt sondaı-aq, Ivan Dychkonyń kásipqoı boksqa ketkenine qatysty otandasyna jeńis tileıtinin jetkizdi.
«Ivan jarady. Ony quttyqtaǵym keledi. Eki kezdesýdi merziminen buryn aıaqtady. Oǵan aldaǵy ýaqytta da jeńiske jete berýin tiler edim. Aıqastarynda Otanymyzdyń aıbynyn asyryp, qazaqstandyq bokstyń keremettiligin tanyta berer degen senimdemin», - deıdi Olımpıadanyń kúmis júldegeri.
Áýesqoı boksta qalǵanyńyzǵa ókinbeısiz be degen suraqqa Levıt «Men turaqtymyn» dep jymıyp qana jaýap berdi.
«Halyq chempıony» atanǵan boksshyǵa sonymen birge, «Qazaqstannyń boks áleminde derjava ekenin qashan sezindińiz?» degen suraq qoıyldy.
«Bala kezimnen bastap boksqa aralasa bastaǵaly biz chempıondarymyzǵa qarap boı túzedik. Aǵa býyn boksshylarǵa árqashan qurmetken qaradyq. Golovkın men Alvarestiń qaıta kezdesýine qatysty ne deımin?.. Ol kezdesýdiń bolatyny nemese bolmaıtyny týraly eshteńe aıta almaımyn. Jankúıer retinde bul aıqas bolyp jatsa zor yqylasymdy, qýanyshymdy bildirer edim. Álbette, Golovkınge jankúıer bolamyz», - deıdi chempıon.
Boksshy sondaı-aq, ózi qatysqan sońǵy Álem chempıonatynda jolyn kesken kýbalyq Erıslandı Savonǵa qatysty pikir bildirdi.
«Álem chempıonatynda kýbalyq Erıslandı Savonmen ótken jekpe-jegińizdi qaıta kórdim. «Qandaı sheshimge keldińiz?» deseńiz, meniń qatelikterim boldy. Demek, áli de jumystar jasaý kerek. Daıyndyqty bastaımyz. Myqtyraq bola túsýge tyrysamyz», - deıdi Levıt.
Eske sala ketsek, búgin qazaq boksyna 84 jyl tolýyna oraı QR Boks federatsııasy Astanadaǵy «Kerýen» saýda oıyn-saýyq ortalyǵynda iri shara ótkizip, gúrzi judyryqty ári «juldyzdy» boksshylardy jankúıerlerimen kezdestirgen bolatyn.
