Vasılıı Levıt qaraǵandylyq stýdentterge jattyǵý jasatty
QARAǴANDY. QazAqparat - Olımpıada oıynynyń júldegerleri Vasılıı Levıt pen Ádilbek Nııazymbetov Qaraǵandyǵa keldi, dep habarlaıdy «QazAqparat» HAA tilshisi.
Tanymal sportshylardy Qazaqstan Respýblıkasy Táýelsizdiginiń 25 jyldyǵyna oraı, Qaztutynýodaǵy Qaraǵandy ekonomıkalyq ýnıversıteti arnaıy is-sharaǵa shaqyrǵan. Merekeni Vasılıı Levıt pen bokstan QR ulttyq quramasynyń bas bapkeri Myrzaǵalı Aıtjanov stýdentterge jattyǵý jasatýdan bastaǵan. «Qaraǵandyǵa árdaıym qýana kelemiz. Bul óziniń tanymal sportshylary bar jaqsy qala. Jumys kestemizdiń tyǵyzdyǵyna qaramastan, kelisim berdik, - dedi Vasılıı Levıt. - Kásibı turǵyda bolmasa da, árbirimiz sportpen shuǵyldanýymyz kerek. Qazaqstanda jalpy sporttyń damýyna úlken mán beriledi. Sportzaldarǵa barýymyz tıis».
Olımpıada júldegeri táýelsizdik alǵannan keıingi qazaqstandyq bokstyń jetistikterin atap ótti. «Ózderińiz kórip júrgendeı, qazaqstandyqtar ár Olımpıadada medal alyp qaıtýda. Vel Barker kýbogynyń úsh ıegeri bar. Bul sportshy darynynyń, jattyqtyrýshy jumysynyń jáne memleketimizdiń sportty damytýǵa degen yqylasynyń jıyntyǵy dep bilemin», - dep atap ótti ol. Vasılıı Levıt barshany QR Táýelsizdik kúnimen quttyqtap, ystyq lebizin bildirdi. Qonaqtar stýdenttermen áńgimelesip, saltanatty jıynǵa qatysty.
