Vasılevti «Aqtóbege» alyp kelgen Saparbaev emes - oblys ákimi
AQTÓBE. QazAqparat - Aqtóbe oblysynyń ákimi Berdibek Saparbaev «Aqtóbe» fýtbol klýbynyń burynǵy bas dırektory Dmıtrıı Vasılevke qatysty óz pikirin bildirdi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev esep berý kezdesýinde turǵyndardyń aryz-shaǵymyn tyńdady. Ardager-jýrnalıst Arystan Aımaǵambetov «Aqtóbe» fýtbol klýbyndaǵy bitpeıtin daýdy aıtyp, burynǵy bas dırektor Dmıtrıı Vasılev týraly ádil sheshim shyǵarýdy surady.
«Fýtboldy bárimiz jaqsy kóremiz. Sondyqtan fýtbol damýy kerek. Ózimizde damytyp, óz fýtbolshylarymyzdy tárbıeleýimiz qajet. Ótken jyly «Aqtóbeniń» quramynda jergilikti jerde tárbıelengen 6 oıynshy oınady. Bizde arnaıy fýtbol akademııasy quryldy, ár aýdanda fılıaly ashyldy. Biz túsinemiz, jankúıerlerge búgin nátıje kerek. Sondyqtan shetelden oıynshylardy da alamyz. Ókinishke qaraı, Dıdar Jalmuqanov ketip qaldy. Meniń oıymsha, Aqtóbeniń árbir azamaty Aqtóbeniń patrıoty bolýy kerek. Qaı jerden shyqqanyn, kimniń arqasynda shyqqanyn, qalaı shyqqanyn umytpaýy kerek. Dıdar Jalmuqannyń ákesi de, meniń orynbasarlarym da shaqyryp, «ketpe, jergilikti fýtbol komandasynyń quramynda oına» dep aıtty. Biraq ol ketip qaldy»,- dedi oblys ákimi Berdibek Saparbaev.
Óńir basshysy qazir isi tergelip jatqan «Aqtóbe» fýtbol klýbynyń burynǵy bas dırektory Dmıtrıı Vasılev týraly da aıtty.
«Vasılev Saparbaevtyń buıyryǵymen taǵaıyndalmaıdy. Vasılevti alyp kelgen Saparbaev emes. Ony Fýtbol federatsııasy taǵaıyndady. Ekinshiden, kinási bar . Qazir tergeý júrip jatyr. Ol bizdiń Qazaqstannyń zańyna sáıkes óz jazasyn alady»,- dedi B.Saparbaev.
