Vashıngtondaǵy tártipsizdikke qatysyp ustalǵandardyń sany 200-den asty
ASTANA. QazAqparat - Vashıngtonda AQSh-tyń 45-shi prezıdenti Donald Trampty ulyqtaý rásimine baılanysty tártipsizdikter jalǵasýda, polıtsııa keminde 217 adamdy tutqyndady, dep jazady lenta.ru Reuters agenttigine silteme jasap.
Osy oqıǵanyń saldarynan 6 polıtsııa qyzmetkeri jaraqat aldy.
Ustalǵan azamattar túni boıy qamaýda otyrady, kelesi kúni olar sottyń aldynda jaýap beredi.
Ustalǵan azamattardyń basym bóligi Tramptyń laýazymyna kirisýine baılanysty saltanatty shara ótip jatqan Pensılvanııa-avenıýdiń birneshe oramynda tutqynǵa alyndy. Búkil qala boıynsha qarsylyq tanytýshylar top-tobymen «Tramp prezıdent emes», «Násilshilderge jol joq» degen maǵynadaǵy urandaryn kóterip shyǵyp jatyr.
Tártipsizdikter ulyqtaý rásimi barysynda bastaldy. Tramptyń bıiligine qarsylar polıtsııamen qaqtyǵysa bastady. Betterin arnaıy maskalarmen jáne oramaldarmen tumshalap alǵan shamamen 500-ge jýyq adam Vashıngtonnyń ortalyǵynan ótti. Olar jol-jónekeı dúkender men jol jıeginde turǵan kólikterdiń terezelerin qıratyp jatyr.
