Vashıngtondaǵy USAID shtab-páteri jabylady

ASTANA.KAZINFORM - Ilon Masktyń aıtýynsha «joıylý» protsesinen ótip jatqan AQSh halyqaralyq damý agenttiginiń (USAID) bas ǵımaraty 3 aqpanda jabylady, agenttik qyzmetkerleriniń kópshiligi qashyqtan jumys isteıdi, dep jazady TASS.

- Agenttik basshylyǵynyń nusqaýymen Vashıngtondaǵy Ronald Reıgan ǵımaratyndaǵy USAID shtab-páteri dúısenbi, aqpannyń 3-i kúni qyzmetkerler úshin jabylady, delingen The Washington Post tilshisi Djon Hadsonnyń X basylymynda jarııalanǵan habarlamasynda.

Hatta agenttiktiń bas ǵımaratynda ornalasqan qyzmetkerlerdiń «qashyqtan jumys isteıtini» de aıtylǵan. Qyzmetine baılanysty ǵımarattyń jumys isteýi úshin qajet keıbir qyzmetkerler basshylyqtyń sheshimi boıynsha jumysyn jalǵastyrady.

Buǵan deıin Fox News USAID shtab-páterindegi barlyq belgi joıylyp, Masktyń komandasy kompıýterlik júıelerdi baqylaýǵa alǵanyn habarlaǵan.

50-den astam USAID jetekshi qyzmetkeri arnaıy ruqsatsyz syrtqy baılanys jasaýǵa tyıym salynǵan ákimshilik demalysqa jiberilgeni habarlandy.

Mask, óz kezeginde, agenttik taratylý protsesinen ótip jatqanyn habarlady. Kásipkerdiń aıtýynsha, USAID-ti qalpyna keltirý múmkin emes.

AQSh-tyń halyqaralyq damý agenttigi - basqa elderge kómek kórsetý úshin qurylǵan Amerıka Qurama Shtattary úkimetiniń táýelsiz agenttigi. Ol 1961 jyly birneshe uıymnyń fýnktsııalaryn biriktirip quryldy. USAID resmı túrde táýelsiz memlekettik mekeme bolǵanymen, Prezıdentke, Memlekettik hatshyǵa jáne Ulttyq qaýipsizdik keńesine baǵynady.

Jarǵyǵa sáıkes, USAID-tyń negizgi baǵyttary ekonomıka, densaýlyq saqtaý jáne bilim berýdi qoldaý, shuǵyl gýmanıtarlyq kómek jáne demokratııany qoldaý, «AQSh syrtqy saıasatynyń saıası maqsattaryn júzege asyrýǵa búkil álemde kómek kórsetýdi» kózdeıdi.