Vashıngtondaǵy Ýkraına sammıti: qandaı nátıjelerge qol jetkizildi
ASTANA. KAZINFORM – Vashıngtonda ótken Ýkraınaǵa qatysty Donald Tramppen kezdesýge eýropalyq kóshbasshylar rıza. AQSh prezıdenti bul kezdesýden keıin Pýtın men Zelenskıı arasyndaǵy sammıtke daıyndyqtyń bastalǵanyn jarııalady, dep jazdy DW.
AQSh prezıdenti Donald Tramp dúısenbi kúni Vashıngtonda ótken Ýkraına prezıdenti Vladımır Zelenskıımen, NATO Bas hatshysy Mark Rıýtte jáne eýropalyq kóshbasshylarmen kezdesýin «óte jemisti» dep baǵalady. Sammıt qorytyndysy boıynsha Tramp Vladımır Zelenskıı men Reseı prezıdenti Vladımır Pýtın arasyndaǵy kelissózderge daıyndyqtyń bastalǵanyn málimdedi.
Óz kezeginde, eýropalyq kóshbasshylar men Ýkraına prezıdenti Kıevke qaýipsizdik kepildikterin usynýǵa AQSh-tyń daıyn ekenin málimdegenine qanaǵattandy.
Tramp: Ýkraınaǵa qaýipsizdik kepildikteri týraly
Aq úıdegi kelissózderden keıin Donald Tramp Ýkraınaǵa qaýipsizdik kepildikteri týraly sóz bolǵanyn, olar «AQSh-pen úılestire otyryp, eýropalyq elder tarapynan usynylatynyn» aıtty.
AQSh kóshbasshysy Truth Social jelisindegi jazbasynda AQSh vıtse-prezıdenti Djeıms Dı Vens, memlekettik hatshy Marko Rýbıo jáne arnaıy ókil Stıven Ýıtkoff Pýtın men Zelenskıı arasyndaǵy kezdesýdi daıyndaıtynyn habarlady. Bul kezdesý keıinirek naqty bir jerde ótedi. Odan keıin Tramptyń ózi de qatysatyn úshjaqty kelissózi ótedi.
Merts sammıt qorytyndysy týraly
Germanııa kantsleri Frıdrıh Merts Vashıngtondaǵy sammıtten kútken nátıjeleri «tek aqtalyp qana qoımaı, asyp tústi» dep málimdedi. Press-konferentsııada ol Pýtın men Zelenskıı arasyndaǵy kezdesý aldaǵy eki apta ishinde ótýi tıis ekenin aıtty.
Merts sammıttiń tórt negizgi habarlamasyn atap ótti, olardyń ishinde — AQSh-tyń qaýipsizdik kepildikterin berýge jáne bul protsesti eýropalyqtarmen úılestirýge daıyn ekendigi.
Ýkraınanyń aýmaqtyq sheginisteri máselesi
Kıevtiń aýmaqtyq sheginisterine qatysty suraqqa jaýap bergen Germanııa kantsleri Ýkraınanyń Donbastan bas tartýy aýqymy jaǵynan AQSh-tyń Florıdadan bas tartýymen teń bolatynyn aıtty.
— Egemen memleket mundaı sheshimdi jaı ǵana qabyldaı almaıdy. Bul — ýkraındardyń ózara kelissózder barysynda ózderi sheshetin másele, — dedi Merts.
Sondaı-aq ol eýropalyq kóshbasshylardyń Tramp jáne Zelenskıımen kezdesýinde Ýkraınanyń Reseıge aýmaq berýi týraly másele kóterilmegenin naqtylady.
Sonymen qatar Germanııa úkimetiniń basshysy 19 tamyzda «qoldaý kórsetýge nıetti elder koalıtsııasy» quramyndaǵy 30 eldiń qatysýymen Ýkraınaǵa qoldaý kórsetý máselesine qatysty vıdeokonferentsııa ótetinin habarlady. Sol kúni Vashıngton sammıtiniń nátıjelerin talqylaý úshin EO Keńesiniń kezekten tys otyrysy da ótedi.
Zelenskıı: «Pýtınmen kelissózderge shartsyz daıynmyn»
Vladımır Zelenskıı soǵystan keıingi Ýkraına qaýipsizdigine AQSh kepildik berýge daıyn ekenin Tramptyń jarııalaýyn «úlken alǵa basý» dep atady. Onyń aıtýynsha, bul kepildikterdiń naqty tetikteri 10 kún ishinde jasalady.
Kıev, atap aıtqanda, osy kepildikter aıasynda AQSh-tan ekonomıkany qoldaý men qarý-jaraq satyp alýǵa arnalǵan qarjylyq kómek alýǵa múddeli ekenin atap ótti.
Zelenskıı sondaı-aq Vladımır Pýtınmen jeke kezdesýge daıyn ekenin jáne beıbit kelissózder úshin atysty toqtatý talabyn qoımaıtynyn aıtty.
Sonymen birge ol Tramptyń Reseımen «bárine bárin» qaǵıdasy boıynsha tutqyndar almasýyn uıymdastyrýǵa kómektesýge daıyn ekenin habarlady. Bul almasýǵa áskerı tutqyndarmen qatar beıbit turǵyndar, jýrnalıster men saıası tutqyndar da qatysady.
Aýmaqtarǵa qatysty máselege kelgende, Zelenskıı bul syndy kúrdeli taqyryptar úshjaqty — Pýtın, Tramp jáne ózi qatysatyn kelissózderde qaralatynyn aıtty.
Al Aq úıdegi kezdesýde kelissóz qalaı ótkenin myna siltemeden oqyńyz.