Vashıngtondaǵy Kennedı ortalyǵy Donald Tramptyń atymen qaıta atalady

ASTANA. KAZINFORM – AQSh astanasy Vashıngtonda ornalasqan Kennedı atyndaǵy oryndaýshylyq óner ortalyǵy Tramp–Kennedı ortalyǵy dep qaıta atalatyn boldy. Ortalyqtyń dırektorlar keńesi ataýdy ózgertý jóninde biraýyzdan sheshim qabyldaǵan. Bul týraly Aq úı habarlady, dep jazady BBC.

Aq úıdiń baspasóz hatshysy Kerolaın Lıvıtt X áleýmettik jelisinde dırektorlar keńesi sońǵy bir jylda prezıdent Donald Tramptyń ǵımaratty «saqtap qalý jolynda atqarǵan aýqymdy jumysyn» atap ótkenin málimdedi.

Kennedı ortalyǵy 1971 jyly salynǵannan beri AQSh-tyń mádenı ómirindegi mańyzdy nysan sanalyp keledi jáne osy ýaqytqa deıin prezıdent Djon Fıtsdjerald Kennedıdiń esimimen atalyp kelgen.

Beısenbi kúni Doǵal keńsede sóılegen sózinde Donald Tramp bul sheshimge tańǵalǵanyn aıtyp, rızashylyǵyn bildirdi. Alaıda ol osy aıdyń basynda Kennedı ortalyǵynyń jyl saıynǵy marapattaý rásiminde ataýdy ózgertý múmkindigin ázil retinde meńzegen bolatyn.

BBC dereginshe, qyzmetine kiriskennen keıin kóp uzamaı Tramp ortalyqtyń dırektorlar keńesiniń barlyq múshesin qyzmetten bosatyp, olardyń ornyna ózine jaqyn saıası odaqtastaryn taǵaıyndaǵan. Keıin bul quram Trampty keńes tóraǵasy etip saılaǵan.

Al onyń keńesshisi ári arnaıy tapsyrmalar jónindegi ókili Rıchard Grenell dırektorlar keńesiniń tóraǵasy boldy. Qazirgi tańda keńes quramynda bas prokýror Pem Bondı, Aq úı apparatynyń basshysy Sıýzı Ýaılz, AQSh-tyń ekinshi hanymy Ýsha Vens, sondaı-aq Tramp ákimshiliginiń ózge de joǵary laýazymdy tulǵalary men saıası seriktesteri bar.

Sonymen qatar prezıdenttiń bastamasymen Kongress ortalyqty kúrdeli jóndeýden ótkizý jáne ózge de shyǵyndar úshin shamamen 257 mıllıon dollar bólgen. Jaqynda atalǵan nysanda fýtboldan álem chempıonatynyń jerebesi de ótken.

— Biz ony saqtap qaldyq. Ol óte nashar jaǵdaıda edi, — dedi Donald Tramp ortalyq týraly pikirin bildirip.

Aıta keteıik, AQSh polıtsııasy Braýn ýnıversıtetindegi shabýylǵa qatysy bar kúdiktini anyqtady.