Vashıngtonda ushaq pen tikushaqtyń soqtyǵysýynan kem degende 18 adam qaza tapty

ASTANA. KAZINFORM — Ózennen keminde 18 adamnyń denesi tabyldy, izdeý-qutqarý operatsııasy jalǵasyp jatyr, dep habarlaıdy CBS News. 

AQSh astanasy Vashıngtonda shaǵyn ushaq Potomak ózenine qulady. Apat Aq úı men Kapıtolııden ońtústikke qaraı tórt shaqyrymdaı jerde ornalasqan Ronald Reıgan áýejaıynyń mańynda boldy.

CBS habarlaýynsha, PSA Airlines áýe kompanııasynyń Bombardier CRJ700 aımaqtyq laınerinde 60 jolaýshy men tórt ekıpaj múshesi bolǵan.

Black Hawk Sikorsky H-60 tikushaǵynda úsh áskerı qyzmetker bolǵan, dep habarlady CBS News-ke AQSh qorǵanys mınıstrliginiń ókili.

AQSh Federaldyq avıatsııa ákimshiliginiń (FAA) habarlaýynsha, sársenbi kúni jergilikti ýaqyt boıynsha keshki saǵat 21:00 shamasynda ushaq Reıgan halyqaralyq áýejaıyna jaqyndap kele jatqanda tikushaqpen soqtyǵysqan. Áýe laıneri Kanzas shtatynyń Vıchıta qalasynan ushty. Tikushaq oqý-jattyǵý ushýyn oryndaǵan.

Bılik ókiliniń habarlaýynsha, sársenbi kúni saǵat 23:30–daǵy jaǵdaı boıynsha qurban bolǵan 18 jolaýshynyń denesi ózennen shyǵaryldy.

CBS qazirgi ýaqytta tiri qalǵandar tabylmaǵanyn jazdy, biraq NBC buǵan deıin Vashıngton aspanyndaǵy ushaq apatynan keminde tórt adam aman qalyp, aýrýhanaǵa jetkizilgenin habarlady. 

Prezıdent Tramp apat týraly tolyq aqparat alǵanyn málimdedi. AQSh prezıdenti qutqarýshylarǵa jumysy úshin alǵys aıtyp, jaǵdaıdy baqylap otyrǵanyn qosyp ótti.