Vashıngtonda Tramppen negizinen Iran máselesi talqylanady – Netanıahý
ASTANA. KAZINFORM – Izraıl premer-mınıstri Bınıamın Netanıahý AQSh prezıdenti Donald Tramppen kelissózder júrgizý úshin Vashıngtonǵa attandy. Bul eki kóshbasshynyń Izraıl men Iran arasyndaǵy qaqtyǵys bastalǵannan keıingi alǵashqy betpe-bet kezdesýi bolmaq, dep habarlaıdy Reuters.
Bul Netanıahýdyń Tramp AQSh prezıdenti qyzmetine qaıta kiriskeli bergi segizinshi kezdesýi jáne bıylǵy aqpannan bergi alǵashqy júzdesýi. Aqpan aıyndaǵy kezdesýden keıin Izraıl men AQSh Iranǵa qarsy birlesken áýe operatsııasyn bastaǵan.
– Osyndaı kúrdeli kezeńde úlken batyldyqpen qatar, parasatty sheshimder de qajet. Biz kún tártibindegi barlyq máseleni, eń aldymen Iran taqyrybyn talqylaımyz. Negizgi maqsatymyz – qaýipsizdigimizdi qamtamasyz etý jáne beıbitshilik keńistigin keńeıtý, – dedi Netanıahý Vashıngtonǵa attanar aldynda jarııalaǵan beıneúndeýinde.
Osy aıda AQSh júrgizgen eki aptalyq áskerı operatsııaǵa Izraıl qatysqan joq. Buǵan jaýap retinde Tegeran AQSh-tyń áskerı bazalaryna soqqy jasaǵan edi.
Ótken demalys kúnderi Donald Tramp áskerı operatsııany toqtatty. Iran AQSh úzilisti saqtaǵan jaǵdaıda óziniń de shabýyldaryn toqtatatynyn málimdedi. Alaıda Izraıl Tegeran tarapynan kez kelgen jańa shabýylǵa qatań jaýap beriletinin eskertti.
Sońǵy aptalarda Netanıahý Taıaý Shyǵystaǵy Izraıl men AQSh múddeleri keı máselede ártúrli bolǵandyqtan, ózi men Tramp arasynda pikir qaıshylyqtary bolǵanyn moıyndady.
Maýsym aıynda eki kóshbasshy arasyndaǵy telefon áńgimesi de kópshilik nazaryn aýdardy. BAQ-ta jarııalanǵan málimetke sáıkes, Tramp Netanıahýdy dóreki sózben synaǵan. Keıin AQSh prezıdenti bul áńgimeniń bolǵanyn ózi de rastady. Bul eki el basshylary arasyndaǵy kelispeýshilikterdiń bar ekenin kórsetti.
Jeksenbi kúni Izraıl Tramp usynǵan Gaza sektoryna qatysty beıbitshilik jospary aıasynda halyqaralyq qaýipsizdik kúshterin óńirge kirgizýge kelisetinin málimdedi.
21 shildede Izraıl sońǵy aptalarda Lıvan bıligimen AQSh-tyń qoldaýymen jasalǵan kelisimderge sáıkes eldiń ońtústigindegi áskerı kúshteriniń bir bóligin qaıta ornalastyrǵanyn habarlaǵan.
Sarapshylardyń pikirinshe, Tramppen ótetin kezdesý Netanıahý úshin ishki saıası turǵydan da mańyzdy. Izraılde 27 qazanda parlament saılaýy ótedi, al qazirgi kezde premer-mınıstrdiń reıtıngi qoǵamdyq saýalnamalarda tómendep keledi.
Aıta keteıik, Netanıahý seısenbi kúni AQSh-qa baryp, Tramppen kezdesetinin jazdyq.
