Vashıngtonda Ramazan aıyna resmı mártebe berildi

ASTANA. KAZINFORM — AQSh-ta Ramazan men Qurban aıt merekelerin resmı túrde moıyndaǵan alǵashqy shtat — Vashıngton — endi musylmandar úshin qasıetti Ramazan aıyn da resmı túrde tanydy. Bul týraly shtat gýbernatory Bob Fergıýson amerıkalyq X áleýmettik jelisindegi paraqshasynda málimdedi, dep jazdy Anadoly agenttigi.

Gýbernatordyń aıtýynsha, shtatta turatyn musylmandar qoǵamnyń ajyramas bóligi, sebebi olar bilim berý, densaýlyq saqtaý, ekonomıka, tehnologııa, óner jáne azamattyq qoǵam salalarynyń damýyna eleýli úles qosyp keledi.

Fergıýson Ramazan aıynyń búkil álemdegi mıllıondaǵan musylman úshin qasıetti kezeń ekenin atap ótti. Bul aıda musylmandar oraza ustap, qulshylyq jasap, qaıyrymdylyqpen aınalysyp, yntymaq-birlikti nyǵaıtady. Onyń sózinshe, bul amaldar jomarttyq, ózin-ózi tárbıeleý, shúkirshilik jáne áleýmettik jaýapkershilik sııaqty qundylyqtardy kúsheıtedi.

Gýbernator sondaı-aq Vashıngton shtatynyń Ramazan men Qurban aıt merekelerin resmı túrde moıyndaǵan alǵashqy shtat ekenin eske saldy.

— Ramazan aıyn oraza jáne duǵamen qarsy alyp jatqan Vashıngton shtatyndaǵy myńdaǵan musylmandardy quttyqtaımyn. Vashıngton shtaty musylman qaýymdastyqtaryn qoldaıdy, — dep jazdy ol.

Gýbernator Ramazan aıyna resmı mártebe beretinin habarlady.  

— Men, Vashıngton shtatynyń gýbernatory Bob Fergıýson, aı kúntizbesine sáıkes jańa aıdyń týýymen bastalatyn 2026 jylǵy 18 aqpan men 19 naýryz aralyǵyn Ramazan aıy dep resmı túrde jarııalaımyn, — dep málimdedi.

Al Túrkııadaǵy Ramazan jaryq, jomarttyq ári kóne dástúrler aıy dep sanalady.