Vashıngtonda «Óz zamanynyń genııleri. Ibn Sına, Bırýnı jáne umytylǵan ulylyq» kitaby tanystyryldy
ASTANA. KAZINFORM – 21 qazanda AQSh astanasy Vashıngtondaǵy Amerıka syrtqy saıasaty keńesiniń ǵımaratynda amerıkalyq shyǵystanýshy Frederık Starrdyń «Óz zamanynyń genııleri. Ibn Sına, Bırýnı jáne umytylǵan ulylyq» atty eńbeginiń qazaqtildi nusqasy tanystyryldy. Atalmysh kitap Halyqaralyq «Qazaq tili» qoǵamynyń bastasymen aýdarylyp, jaryq kórdi. Tanystyrylym Qazaqstannyń AQSh-taǵy Elshiliginiń qoldaýymen ótti.
«Óz zamanynyń genııleri. Inbn Sına, Bırýnı jáne umytylǵan ulylyq» («The Genius of Their Age: Ibn Sina, Biruni, and the Lost Enlightenment») – Shyǵys aǵartýshylyǵynyń kórnekti ókilderi – Ibn Sına jáne Bırýnıdiń túrli ǵylym salasyna qosqan ólsheýsiz úlesi men ǵıbratty ǵumyrlary baıandalǵan eńbek. Buǵan deıin «Qazaq tili» qoǵamy oqyrmanǵa avtordyń «Umytylǵan ulylyq: Ortalyq Azııanyń arab shapqynshylyǵynan Ámir Temirge deıingi altyn ǵasyry» atty birinshi kitabyn qazaq tilinde usyndy. Bul kitaptar Orta Azııa elderiniń ortaq zııatkerlik murasy men tarıhyna arnalǵan.
Ortalyq Azııa óńiri úshin asa mańyzdy týyndyny qazaq tiline aýdarýǵa Memleket basshysy Qasym-Jomart Toqaevtyń «Ortalyq Azııa renessansy: ornyqty damý jáne órkendeý joly» atty maqalasy túrtki boldy. Prezıdenttiń Ortalyq Azııa elderiniń ortaq maqsattary men bolashaǵy jaıly ıdeıasyn damyta túsetin shyǵystyń qos ǵulamasynyń álem ǵylymy men adamzat aqyl-oıynyń damýyna qosqan úlesi baıandalǵan qundy eńbek qazaq tiline aýdarylyp, oqyrmanǵa usynylyp otyr.
Jıynǵa kitap avtory, amerıkalyq shyǵystanýshy Frederık Starr, Freedom Holding Corp. Dırektorlar keńesiniń múshesi Qaırat Kelimbetov, Halyqaralyq «Qazaq tili» qoǵamynyń prezıdenti Raýan Kenjehanuly qatysty.
«Ortalyq Azııanyń adamzat ǵylymy men bilimine qosqan zor úlesin tamasha mysaldarmen, naqty dáıek-dálelder arqyly baıandaıtyn mundaı eńbekti qazaq tiline aýdarýdyń, menińshe mańyzy zor. Óz elimizdegi qaýym da, álemdegi oqyrmandar da Orta Azııany úlken bilim men ǵylym oshaǵyna aınaldyrǵan entsıklopedıst-ǵalymdarynyń ómiri jáne jasaǵan qyzmeti týraly bilýi kerek. Sondaı-aq Orta Azııanyń osyndaı 500 jyldyq «altyn ǵasyryna» alǵyshart bolǵan ne jáne onyń toqyraýyna alyp kelgen ne degen suraqtarǵa jaýap izdeýimiz qajet», - dedi Halyqaralyq «Qazaq tili» qoǵamynyń prezıdenti Raýan Kenjehanuly.
«Óz zamanynyń genııleri. Inbn Sına, Bırýnı jáne umytylǵan ulylyq» týyndysyn Qazaqstannyń ashyq kitaphanasy – Kitap.kz portalynan tegin oqýǵa bolady.
