Vashıngtonda qurylys magnaty men onyń otbasynyń jansyz deneleri tabyldy
ASTANA. QazAqparat - AQSh astanasynyń bedeldi aýdandarynyń birinde ornalasqan úıde Amerıkanyń iri kompanııasynyń basshysy, onyń zaıyby jáne olardyń 10 jasar uly men úı qyzmetshisiniń jansyz deneleri tabyldy, dep habarlaıdy Lenta.rý.
CBS Local habarlaǵandaı, bul otbasy Vashıngtonda AQSh vıtse-prezıdenti Djozef Baıdenge jaqyn jerde turǵan. Tergeý málimetterinshe, beısenbi, 14 mamyr kúni qylmyskerler záýlim úıdiń ishine kirip, onyń ishinde bolǵan adamdardy óltirgen soń, ǵımaratty órtep jibergen. Vashıngton polıtsııasynyń basshysy Ketı Lenıer (Cathy Lanier) úsh qurbannyń pyshaqpen nemese doǵal zatpen jaraqattar salynǵanyn habarlady. Onyń aıtýynsha, tórt adamnyń barlyǵy úıde óltirilgen. Bul jerde sondaı-aq benzınniń ıisi de bilingen.
Polıtsııanyń bergen málimetterine qaraǵanda, qaskúnemderdiń qolynan American Iron Works kompanııasynyń 46 jastaǵy basshysy Savvas Savopolýs (Savvas Savopoulos), onyń 47 jastaǵy zaıyby Emı Savopolýs (Amy Savopoulos), olardyń 10 jasar uly Fılıp (Philip) jáne úı qyzmetshisi bolǵan Veralısııa Fıgeroa (Veralicia Figueroa) qaza tapty. Bul juptyń sondaı-aq qylmys jasaý kezinde mektep-pansıonatynda bolǵan eki qyzy qaldy. Qazirgi kezde qyzdar qaýipsiz jerde, dep qosyp ótti Lenıer.
