Vashıngtonda Qazaqstan men AQSh arasyndaǵy strategııalyq seriktestik talqylandy
Qazaqstandyq delegatsııanyń Vashıngtonǵa sapary barysynda Qazaqstan men AQSh arasyndaǵy keńeıtilgen strategııalyq seriktestik jónindegi komıssııanyń saıası, ekonomıkalyq jáne gýmanıtarlyq máseleler jónindegi komıtetteriniń otyrysy ótti.
«Komıssııa jumysyna teń tóraǵalar retinde Qazaqstan Respýblıkasy Syrtqy ister mınıstriniń orynbasary Erjan Ashyqbaev jáne Memlekettik hatshynyń Ońtústik jáne Ortalyq Azııa isteri jónindegi birinshi orynbasary Elıs Ýells qatysty. Qazaqstandyq delegatsııa quramyna ishki ister, ulttyq ekonomıka, saýda jáne ıntegratsııa, aqparattyq jáne áleýmettik damý, eńbek jáne halyqty áleýmettik qorǵaý jáne ádilet mınıstrlikteriniń ókilderi kirdi» delingen habarlamada.
Komıssııa otyrysynyń negizgi maqsaty - ekijaqty yntymaqtastyqtyń qazirgi jaǵdaıyn jáne Qazaqstan men Amerıka Qurama Shtattary arasyndaǵy strategııalyq seriktestiktiń bolashaǵyn anyqtaý boldy.
Іs-sharanyń kún tártibi jahandyq jáne aımaqtyq qaýipsizdik salasyndaǵy yntymaqtastyq, lańkestik pen esirtki bıznesine qarsy is-qımyl, Sırııa men Iraktaǵy soǵys aımaqtarynan Qazaqstan azamattarynyń repatrıatsııasy jáne reıntegratsııasy sııaqty kóptegen taqyryptardy qamtydy. Kıberqaýipsizdik, saýda-ekonomıkalyq jáne ınvestıtsııalyq yntymaqtastyq, Ortalyq Azııadaǵy aımaqtyq saýda qatynastaryn nyǵaıtý, halyqaralyq uıymdar sheńberindegi ózara is-qımyl, gýmanıtarlyq ólshem men adam quqyqtary salasyndaǵy yntymaqtastyq ta qarastyrylady.
Komıssııaǵa qatysýshylar Qazaqstan ekonomıkasyn ártaraptandyrý jolynda iskerlik seriktestikti odan ári tereńdetýdiń, atap aıtqanda ónerkásiptik óndiris, aýylsharýashylyǵy, densaýlyq saqtaý jáne qarjy salalarynda mańyzdylyǵyn atap ótti.
«Sonymen qatar, ekijaqty saýda, onyń ishinde Jalpy preferentsııalar júıesi aıasynda keńeıtý máseleleri talqylandy. Taraptar ekijaqty ǵylymı-tehnıkalyq yntymaqtastyq jónindegi komıssııanyń jumysyn jandandyrýdyń mańyzdylyǵyn atap ótti. Qazaqstanda DSU mınıstrlik kezdesýine daıyndyq kezinde yntymaqtastyq ornatý týraly, sondaı-aq Qazaqstannyń EYDU-ǵa kirýi týraly kelisimge qol jetkizildi» dep málim etti vedomstvodan.
Gýmanıtarlyq ólshemder jónindegi komıtettiń otyrysynda bilim berý jáne mádenıet salasyndaǵy yntymaqtastyqty qurý, BAQ-ty damytý jáne qazaqstandyq úkimettik emes sektordy qoldaý joldary qarastyryldy. Amerıkandyq tarap Qazaqstannyń osy baǵyttardaǵy kúsh-jigerin joǵary baǵalady.