Vashıngtonda «Qaraǵandy – Jezqazǵan» avtojolynyń jobasy boıynsha kelisimge qol qoıyldy
ASTANA. KAZINFORM – Qazaqstandyq delegatsııanyń Vashıngtonǵa resmı sapary barysynda Dúnıejúzilik banktiń shtab-páterinde «Qaraǵandy-Jezqazǵan» avtojolynyń qurylysyn qarjylandyrý týraly kelisimge qol qoıyldy. Bul týraly Úkimettiń baspasóz qyzmeti habarlady.
Kelisim «QazAvtoJol» UK» AQ, Halyqaralyq qaıta qurý jáne damý banki men Azııa ınfraqurylymdyq ınvestıtsııalar banki arasynda jasaldy.
Joba kólik ınfraqurylymyn damytýǵa, tranzıttik áleýetti arttyrýǵa jáne óńirlerdiń baılanysyn jaqsartýǵa arnalǵan. Jańa jol júrý ýaqytyn edáýir qysqartýǵa, qozǵalys qaýipsizdigin arttyrýǵa jáne Ortalyq Qazaqstannyń damýyna qosymsha serpin beredi.
Qazirgi ýaqytta konkýrstyq rásim sońǵy satyda tur. Joldyń uzyndyǵy 457 shaqyrym. Jobanyń quny – 650 mlrd teńge. Bıyl avtojol qurylysy bastaý alady. Joba sonymen qatar logıstıkany damytýǵa, óńirdiń ınvestıtsııalyq tartymdylyǵyn arttyrýǵa jáne jańa jumys ornyn qurýǵa múmkindik beredi.
Jumys jaqyn ýaqytta bastalady.
Premer-mınıstrdiń orynbasary – Ulttyq ekonomıka mınıstri Serik Jumanǵarın Vashıngtonda Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti Antonella Bassanımen jáne Dúnıejúzilik bank tobynyń ókilderimen kezdeskenin jazǵan bolatynbyz.
