Vashıngtonda Izraıl elshiliginiń eki qyzmetkeri oqqa ushty

ASTANA. KAZINFORM – 21 mamyr, sársenbi kúni keshke Vashıngtondaǵy Capital Jewish Museum (Evreıler murajaıy) aldynda Izraıl elshiliginiń eki qyzmetkeri oqqa ushty, dep habarlaıdy DW.

Polıtsııanyń málimetinshe, kúdikti ustalǵan. Ol – Chıkagodan kelgen 30 jastaǵy Elıas Rodrıges. Ol murajaı mańynda biraz júrgen soń ishke kirip, tórt adamnan quralǵan topqa jaqyndap, ekeýin atyp tastaǵan. Qylmyskerdi qaýipsizdik qyzmeti dereý ustaǵan. Ustalǵan kezde ol «Palestınaǵa bostandyq!» dep aıqaılaǵan.

Izraıl elshiliginiń ókili eki qyzmetkerdiń Evreıler murajaıyndaǵy shara kezinde oqqa ushqanyn rastady. Qaza tapqandar – er men áıel, jas jup bolǵan.

AQSh prezıdenti Donald Tramp Truth Social platformasynda marqumdardyń otbasyna kóńil aıtyp, bolǵan oqıǵany antısemıtızmniń saldary dep baǵalady.

AQSh bıligi oqıǵanyń mán-jaıyn tergep jatyr

AQSh-tyń Іshki qaýipsizdik mınıstri Krıstı Noem eki ızraıldik qyzmetkerdiń qaza tapqanyn rastady.

– Biz bul oqıǵany jan-jaqty zerttep, qosymsha málimet alýǵa kúsh salyp jatyrmyz, – dep jazdy ol X áleýmettik jelisinde.

Izraıldiń BUU-daǵy turaqty ókili Danı Danon bul oqıǵany «antısemıttik terrorızmniń jıirkenishti áreketi» dep atady. Onyń aıtýynsha, dıplomattar men evreı qaýymyna jasalǵan mundaı shabýyl – «shekten shyǵý» degen sóz.

Danon AQSh bıligi kinálilerdi qatań jazalaıtynyna senim bildirip, Izraıl azamattary men ókilderin búkil álemde qorǵaýdy jalǵastyra beretinin aıtty.

Buǵan deıin Qytaıdaǵy túngi bazarda atys bolyp, eki adam qaza tapqanyn jazdyq.