Vashıngtonda benzın tapshylyǵy saqtalyp otyr

NUR-SULTAN. QazAqparat – AQSh-tyń Vashıngton qalasynda benzın tapshylyǵy áli de saqtalyp otyr. Defıtsıt Colonial Pipeline otyn jelisine jasalǵan kıbershabýyldan keıin paıda bolǵan edi, dep habarlaıdy QazAqparat Amerıka daýysy basylymyna silteme jasap.

Jaǵdaıdy baqylap otyrǵan GasBuddy saıtynyń málimetinshe, juma kúni AQSh astanasyndaǵy kólikke janarmaı quıý stansalarynyń 88 paıyzynda benzın bolǵan joq.

AQSh prezıdenti Djo Baıden kólik júrgizýshilerine osy demalys kúnderi otyn jetkizý normasyna keletinin aıtyp, ýáde etti.

Buǵan deıin Colonial Pipeline otyn qubyry jumysynyń tolyq qalpyna kelgenin málim etken.

Amerıka avtomobıl qaýymdastyǵynyń málimetinshe, elde benzıınniń ortasha baǵasy bir gallon úshin 3,04 dollarǵa deıin jetken.

Bul – 2014 jyldyń qazan aıynan beri tirkelgen eń joǵary baǵa.

Eske sala ketsek, birneshe kún buryn bopsalaý baǵdarlamasyn qoldaný arqyly jasalǵan kıbershabýyl AQSh-taǵy eń iri otyn qubyrynyń jumysyn toqtatyp, otyn jetkizýge kedergi keltirgen.

Beısenbi kúni prezıdent Djo Baıden hakerlerdiń Reseı aýmaǵynan áreket jasaǵanyn, alaıda AQSh bul kıbershabýyl artynda Reseı tur dep sanamaıtynyn málimdegen.

Sonymen birge ol hakerlerdi jaýapqa tartý qajet ekenin aıtyp, qarsy sharalar qoldanatynyn joqqa shyǵarǵan joq.