Vashıngtonda alǵash ret IndyCar jarysy ótti
ASTANA. KAZINFORM – Vashıngton qalasynyń ortalyǵy jeksenbi kúni IndyCar jarysyna arnalǵan avtodromǵa aınaldy. Bolıdterdiń jyldamdyǵy saǵatyna 285 shaqyrymǵa deıin jetken. Jarys AQSh-tyń 250 jyldyǵyna oraı uıymdastyryldy.
«Freedom 250 Grand Prix» jarysy uzyndyǵy 1,7 mıl bolatyn jeti burylysty trassada 147 aınalymnan turdy. Jalpy qashyqtyq 250 mıldi qurady. Marshrýt Kapıtolıı men Vashıngton monýmenti sekildi el astanasynyń tanymal nysandarynyń mańymen ótti.
Jarys aldynda Vashıngtonda qaýipsizdik sharalary kúsheıtilip, qala ortalyǵyndaǵy birneshe kóshe men kvartal jabyldy. AQSh prezıdenti Donald Tramp jasyl jalaýmen jarysty bastap berdi. Al márege kólik qozǵalysy mınıstri Shon Daffı jalaýly belgi arqyly jol ashty.
Jarysqa deıin Donald Tramp prezıdenttik brondy kólikpen trassada qurmet sheńberin jasap, kópshilik nazaryna tústi.
Jarysta Florıda shtatynyń týmasy Kaıl Kırkvýd jeńiske jetti. Ol «Andretti Global» komandasynyń atynan óner kórsetip, chempıonat kóshbasshysy Aleks Paloýny Ulttyq muraǵat mańynda basyp ozdy. Kırkvýd jarys sońyna deıin kóshbasshylyǵyn saqtap qaldy.
Uıymdastyrýshylardyń málimetinshe, sharaǵa shamamen 140 myń adam kelgen. Jarys Vashıngtondy tanytyp, qala ekonomıkasyn damytýǵa yqpal etetin iri shara retinde usynyldy.
Aıta keteıik, Kongress bastapqyda Kapıtolııdi aınalyp ótetin marshrýtty maquldamaǵan. Keıin Donald Tramptyń jarlyǵymen jarys baǵyty ózgertildi.
Jarystyń demeýshileri qatarynda «Boeing», «Starlink», «Delta», «Amazon» jáne «Shell» kompanııalary bar. Olardyń keıbiriniń AQSh federaldyq úkimetimen baılanysty iri kommertsııalyq múddeleri bar.
Bul — Donald Tramptyń AQSh-tyń 250 jyldyǵyna arnalǵan mereıtoılyq sharalary aıasyndaǵy ekinshi iri sporttyq is-sharasy. Buǵan deıin Aq úı aýmaǵynda UFC jekpe-jegi uıymdastyrylǵan.
Aıta ketelik Aq úıdiń aldynda UFC týrnıri arenasynyń qurylysy bastalǵany týraly jazǵan edik.
