Vashıngton shtaty «mıllıonerler salyǵyn» engizdi

ASTANA. KAZINFORM – Vashıngton shtatynyń zań shyǵarýshylary shtattyń kóp mıllıard dollarlyq bıýdjet tapshylyǵyn jabý úshin «mıllıonerler salyǵy» atalyp ketken zań jobasyn qabyldady, dep habarlaıdy Kazinform agenttiginiń Vashıngtondaǵy menshikti tilshisi Fox Business-ke silteme jasap. 

Shtat Senaty jeke tulǵalar nemese erli-zaıyptylar úshin 1 mln dollardan asatyn tabysyna 9,9% salyq engizýdi qarastyryp otyrǵan zań jobasyn qabyldady.

Salyqtan jınalǵan qarajat qazirgi ýaqytta birneshe mıllıard dollar tapshylyǵyna tap bolyp otyrǵan memlekettik bıýdjetke túsedi.

Salyq túsimderi sonymen qatar jumys isteıtin otbasylar men shaǵyn bıznes ıeleri úshin turǵyn úı qoljetimdiligin jaqsartýǵa baǵyttalǵan baǵdarlamalarǵa jumsalmaq.

Zańnama 2028 jyldyń 1 qańtarynan bastap kúshine enedi, al salyq tólemderi 2029 jyldan bastalady. Bul sheshim búkil shtat boıynsha 21 myń turǵynǵa áser etedi dep josparlanyp otyr.

Zań jobasy bul bastamany qoldaǵan gýbernator Bob Fergıýson qaraýyna usynyldy.

Synshylardyń pikirinshe, bul tabysy joǵary adamdardyń ketýine ákelip, tehnologııalyq sektor zardap shegýi múmkin. Salyq qorynyń aǵa ǵylymı qyzmetkeri Djared Ýolchak agressıvti salyq Vashıngton ekonomıkasyna aıtarlyqtaı zııan keltiredi dep sanap otyr. Ol shtattyń tehnologııa sektorynyń aıtarlyqtaı bóligi onsyz da óte joǵary bıznes salyqtaryna ushyrap otyrǵanyn, al 9,9% kólemindegi tabys salyǵy kompanııalardy óndirisin jáne jumys oryndaryn basqa shtattarǵa kóshirýge májbúr etýine sebep bolýy múmkin ekenin atap ótti.

Osyǵan deıin Kalıfornııada baılarǵa salynatyn salyq mıllıarderlerdiń shtattan ketýine sebep bolýy múmkin ekenin jazdyq.