Vashıngton operasynyń ártisteri Tramp esimi berilgen óner ortalyǵynan ketip jatyr

ASTANA. KAZINFORM — Kennedı atyndaǵy oryndaý óneri ortalyǵynyń dırektorlar keńesi óner ordasyna Donald Tramptyń atyn berý týraly sheshim shyǵarǵannan keıin kóptegen ónerpaz ben mýzykanttar josparlanǵan qoıylymdarǵa shyǵýdan bas tartty, dep habarlaıdy NBC.

Basshylyqtyń áreketine jaýap retinde Vashıngton ulttyq operasy júzdegen qoıylym ótkizgen Kennedı-ortalyǵynan ketetinin jarııalady.

«Qarjylyq saqtyq pen teńgerimdi bıýdjet mindettemelerin oryndaý maqsatynda, Vashıngton ulttyq operasy kóktemgi maýsymdy qysqartady jáne qoıylymdardy jańa oryndarǵa aýystyrady. Bul sheshim opera trýppasynyń ári qaraı damýy úshin eń qolaıly jaǵdaılardy qamtamasyz etý maqsatynda qabyldandy», delingen trýppa málimdemesinde.

Kelesi aptalarda opera jańa qoıylym oryndaryn jarııalaıdy.

Ártister Kennedı-ortalyǵynda 1971 jyldan bastap óner kórsetip keledi. Málimdemede «birlesken is-áreket eshqashan turaqty dep qarastyrylmaǵan» delingen.

Buǵan deıin Donald Tramp Truth Social platformasy arqyly dırektorlar keńesiniń múshelerin, onyń ishinde tóraǵany da «óner men mádenıettegi altyn dáýirdi bizdiń kózqarasymyzben bólispeıtinder» dep, qyzmetten shyǵarǵanyn jarııalaǵan.

Aqpan aıynda jańa dırektorlar keńesi Trampty tóraǵa etip saılady. Al ótken aıda Djon F. Kennedı atyndaǵy oryndaý óneri ortalyǵyna Tramptyń aty qosylyp, mekeme «Tramp-Kennedı ortalyǵy» dep ataldy.

Osydan keıin Bela Flek, «Zlaıa vedma» mıýzıklynyń kompozıtory Stıven Shvarts sııaqty mýzykanttar óz qoıylymdaryn ortalyqtan ótkizýden bas tartty. Stıven Shvarts bul ortalyqta gala-kontsertter ótkizýdi toqtatqanyn aıtyp, «onyń qatysýy ıdeologııalyq málimdemege aınaldy» dedi.

Kennedı otbasy da ataýdy ózgertýge qarsy pikir bildirdi. Ókilder palatasynyń burynǵy múshesi Djozef Kennedı III áleýmettik jelide:

«Kennedı ortalyǵy — bul qaıtys bolǵan prezıdentke arnalǵan tiri eskertkish jáne federaldyq zań boıynsha ol Kennedı esimimen atalǵan. Lınkoln eskertkishiniń atyn ózgertýge bolmaıtyny sııaqty dál solaı onyń da atyn ózgertýge bolmaıdy», dep jazdy.

Eske sala ketsek, jýyrda Vashıngtondaǵy Kennedı ortalyǵy Donald Tramptyń esimimen qaıta atalatyny belgili bolǵan edi.