Varshavada NATO sammıti bastaldy
ASTANA. QazAqparat - Varshavada eki kúndik NATO sammıti ashyldy.
Oǵan NATO-ǵa múshe 28 eldiń memleket jáne úkimet basshylarynan bólek 26 seriktes-memlekettiń delegatsııasy jáne negizgi halyqaralyq uıymdar qatysýda. Memleket basshylarymen birge syrtqy ister jáne qorǵanys mınıstrleri bardy, sammıt alańynda mınıstrlikter deńgeıinde kóptegen eki jaqty kezdesýler ótedi.
Varshavalyq forýmnyń basty taqyryby alıanstyń shyǵys jáne ońtústik-shyǵys baǵyttaǵy qorǵanysyn kúsheıtý, sonymen qatar túrli aımaqtardaǵy NATO seriktes elderimen, negizinen Taıaý Shyǵystaǵy eldermen yntymaqtastyqty kúsheıtý bolmaq.
Sammıtte sheshiletin máselelerdiń qatarynda: Polsha men Baltııanyń úsh elinde tórt kóp ultty batalondy ornalastyrý, Rýmynııada kópultty brıgadany qura bastaý, NATO zymyranǵa qarsy qorǵanys júıesin áskerı daıyndyqtyń bazalyq (negizgi) deńgeıine shyǵarý týraly jarııalaý, sonymen qatar Jerorta teńizinde bolýy men alıanstyń Parsy shyǵanaǵy elderimen yntymaqtastyǵy jáne Aýǵanstanda áskerı emes sharalardy uzartý bar.
NATO lıderleri men Varshavaǵa shaqyrtylǵan EO ınstıtýttarynyń basshylary eki uıymnyń yntymaqtastyǵy týraly birlesken deklaratsııaǵa qol qoıdy.
Sammıtte áskerı shyǵyndardy arttyrý jaıy qaralady.
Juma kúni alıans elderiniń lıderleri Reseımen qarym-qatynasty jáne aldaǵy ýaqytta Reseı-NATO (SRN) jelisi boıynsha kezdesýler ótkizý perspektıvalaryn talqylaıdy. Elshiler dárejesindegi SRN-nyń aldaǵy jıyny 13 shildede ótedi dep josparlanǵan. Onda Ýkraına, Aýǵanstan jáne varshavalyq sammıt qorytyndysy týraly sóz bolmaq.
Sammıt aıasynda NATO - Ýkraına jáne NATO - Grýzııa Komıssııalarynyń otyrystary ótti, dep jazdy TASS.
