Varshava, Izmır, Larnaka: Qazaqstannan birneshe elge áýe reısteri ashyldy
ASTANA. KAZINFORM — 31 mamyrda «LOT Polish Airlines» polıak áýe kompanııasy Almaty-Varshava baǵytynda tikeleı turaqty reısterdi iske qosty. Bul týraly QR Syrtqy ister mınıstrliginiń resmı ókili Erlan Jetibaev málimdedi.
Jańa reıs jazǵy maýsymda aptasyna 4 ret, al qysqy maýsymda — aptasyna 3 ret oryndalady dep josparlanyp otyr.
— Qazir de LOT áýe kompanııasy Varshava-Astana baǵyty boıynsha turaqty reısterdi oryndap júr. Almatyǵa jańa baǵyttyń ashylýy Qazaqstan men Polsha arasyndaǵy kólik-logıstıkalyq baılanystardy keńeıtýdegi mańyzdy qadam bolmaq, — dedi Erlan Jetibaev Astanada ótken aptalyq brıfıngte.
Sondaı-aq bıyl 31 shildeden bastap «SunExpress» áýe kompanııasy Izmır — Almaty — Izmır baǵytynda tikeleı reısterdi iske qosady. Reıster 2026 jylǵy qazan aıynyń sońyna deıin aptasyna eki ret ushyrylady.
Al erteń, 2 maýsymnan bastap «Air Astana» Astana-Larnaka baǵyty boıynsha tikeleı reısterdi iske qosady. Bul reıster aptasyna eki ret (seısenbi, senbi) oryndalady.
Odan bólek, 4 maýsymnan bastap áýe kompanııasy Almaty-Larnaka baǵyty boıynsha aptasyna eki ret (beısenbi, jeksenbi) reısterdi iske qosady. Bul rette Qazaqstan azamattaryna Kıprge kirý úshin vıza rásimdeý qajet.
— Jańa reısterdiń iske qosylýy saýda-ekonomıkalyq, ınvestıtsııalyq, týrıstik jáne gýmanıtarlyq baılanystardy nyǵaıtýǵa, iskerlik qatynastardy damytýǵa, sondaı-aq azamattarǵa qosymsha múmkindikter jasaýǵa yqpal etedi. QR Syrtqy ister mınıstrligi sheteldik mekemelermen, ýákiletti memlekettik organdarmen jáne sheteldik seriktestermen ózara is-qımyl sheńberinde halyqaralyq áýe qatynasynyń geografııasyn keńeıtý, kólik-logıstıkalyq baılanystylyqty arttyrý jáne azamattardyń iskerlik ári týrıstik utqyrlyǵy úshin qolaıly jaǵdaı jasaý baǵytynda turaqty ári keshendi jumys júrgizýde, — dedi Erlan Jetibaev.
Buǵan deıin QR SІM fýtboldan Álem chempıonatyna baratyn qazaqstandyqtarǵa eskertý jasaǵan edi.
