Varshada Qazaqstannyń burynǵy sottalǵandardy qoǵamǵa qaıta beıimdeý tájirıbesi tanystyryldy
ASTANA. KAZINFORM — Qazaqstanda sottalǵan azamattardyń bostandyqqa shyqqannan keıin qoǵamǵa qaıta beıimdelýine kómektesý jáne qaıtalama quqyq buzýshylyqtardyń aldyn alý úshin qylmystyq-atqarý júıesindegi áleýmettik qyzmetkerlerdiń rólin kúsheıtý usynyldy.
Sottalǵandardy áleýmettik ortaǵa qaıta beıimdeý tetikterin damytý jónindegi usynystardy Ulttyq kásibı áleýmettik qyzmetkerler alıansynyń prezıdenti Dınara Esimova Varshada ótip jatqan EQYU-nyń Adamı ólshem jónindegi konferentsııasynyń tórtinshi sessııasynda tanystyrdy.
Esimovanyń aıtýynsha, jazasyn ótegennen keıin azamattar jumysqa ornalasý, otbasylyq baılanystaryn qalpyna keltirý jáne qoǵamǵa beıimdelý kezinde eleýli qıyndyqtarǵa tap bolady. Sondyqtan kásibı áleýmettik qoldaý adam túzeý mekemesinen bosatylǵan sátte toqtamaýǵa tıis.
— Adam bostandyqqa shyqqannan keıin ne bolady? Formaldy túrde ol jazasyn ótep boldy. Biraq onyń jumysy, jaqyndarynyń qoldaýy, qalypty ómirge oralý múmkindigi bar ma? Sondyqtan áleýmettik jumys qylmystyq-atqarý júıesiniń ajyramas bóligine aınalýy kerek, — dedi Dınara Esimova.
Alıanstyń usynystary Qazaqstannyń qylmystyq-atqarý júıesin damytý tujyrymdamasyn ázirleý barysynda eskerilgen. Qoǵamdyq birlestik azamattyń qoǵamǵa tolyq beıimdelýine deıin qoldaý kórsetetin bilikti mamandar tobyn qalyptastyrýdy jaqtaıdy. Osy maqsatta kásibı standarttar ázirlenip, mamandar daıarlanyp, ár azamattyń jeke qajettilikterine sáıkes qoldaý baǵdarlamalary jasalady.
Sarapshynyń baǵalaýynsha, júıeli tásil quqyq buzýshylyq statıstıkasyna aıtarlyqtaı yqpal ete alady. Uzaq merzimdi perspektıvada alıans áleýmettik qaıta beıimdeý arqyly bas bostandyǵynan aıyrý oryndaryna qaıta oralatyn adamdardyń sanyn eki esege jýyq qysqartýdy kózdeıdi.
Bastamalar aıasynda túzeý mekemelerinde jazasyn ótep jatqan áıelderge de erekshe kóńil bólinedi. Mádenıet jáne aqparat mınıstrliginiń qoldaýymen alıans «Emdeıtin kitaptar» («Knıgı, kotorye lechat») jobasyn júzege asyryp jatyr. Joba kitap terapııasy sabaqtary men ózara qoldaý toptarynyń jumysyn biriktiredi.
Jobaǵa qatysýshylar birlesip kitap oqyp, ony talqylaıdy, óz sezimderimen bólisedi jáne ómirlik tájirıbesin qaıta paıymdaýǵa múmkindik alady. Mundaı jumys emotsıonaldyq qoldaý kórsetip, áıelderdi qoǵamǵa oralýǵa psıhologııalyq turǵydan daıyndaýǵa kómektesedi.
— Biz ońaltý jumysy bas bostandyǵynan aıyrý oryndarynda bastalyp, adam bostandyqqa shyqqannan keıin de jalǵasýy kerek dep esepteımiz, ıaǵnı ol qoǵamda óz betinshe turaqty ómir súre alatyn deńgeıge jetkenshe qoldaý kórsetilýge tıis, — dep atap ótti alıans basshysy.
