Vanýatýdaǵy jer silkinisinen 14 adam qaza tapty

ASTANA. KAZINFORM — Vanýatý astanasy Port-Vıla qalasynda 7,3 baldyq jer silkinisi boldy. Keminde 14 adam qaza taýyp, 200-ge jýyq adam jaraqat aldy, dep jazady VVS.

Jer silkinisi seısenbi kúni jergilikti ýaqyt boıynsha saǵat 12:47–de boldy. Tótenshe jaǵdaılardy basqarý úkimetiniń málimetinshe, Port Vılada kem degende 10 ǵımarat zaqymdanǵan. Jer silkinisinen keıingi dúmpýler elektr qýaty men uıaly telefon baılanysynyń úzilýine sebep boldy.

Vanýatýdaǵy iskerlik keńesiniń tóraǵasy Glen Kreıg bir ǵımarat erekshe zaqymdanǵanyn, onda birneshe elshilikter, sonyń ishinde AQSh elshiligi men Ulybrıtanııanyń joǵarǵy komıssııasy ornalasqanyn aıtty.

Jergilikti turǵyndardyń aıtýynsha, túnde birneshe ret jer silkinisi bolyp, kóshkinniń júrýine sebep bolǵan. Alty adam kóshkinnen qaza tapty, taǵy tórt adam jer silkinisi kezinde qulaǵan ǵımaratta bolǵan.

— Qaza bolǵan 14 adamnyń ekeýi Qytaı azamattary, — dep habarlady Qytaıdyń Vanýatýdaǵy elshisi Lı Mıngan.

Zardap shekkender sany artýy múmkin. Qutqarýshylar jer silkinisi saldarynan ǵımarattarda qalyp qoıǵan adamdardy shyǵarý jumystaryn júrgizip jatyr.

— Qalada qutqarý jumystary júrgizilip jatqan kezde qoǵamdyq qozǵalysty shekteý úshin jeti kúndik tótenshe jaǵdaı jarııalandy, — dep habarlady jergilikti polıtsııa.

Eske salsaq, Tynyq muhıtynda Vanýatý mańynda qýatty jer silkinisi bolǵany anyqtaldy.