Vankýverde alǵashqy ondyqqa kire alsaq, Qazaqstanda ótetin qysqy Azııa oıyndarynda biz qurlyqta birinshi bolamyz - Eseı Jeńisuly

jasóspirimderge arnalǵan respýblıkalyq "Ulan" gazetiniń bas redaktory Eseı Jeńisulymen suhbattasqan edik.

- Qazaqstandyq sport súıer qaýym qazir nazaryn Vankýverde ótip jatqan qysqy Olımpıada oıyndaryna aýdaryp, eleńdep otyr. Bári qalaı bolǵanda da sportshylarymyzdan úlken úmit kútedi. Sport jýrnalısi retinde osy olımpıadanyń mańyzy men sportshylardyń múmkindikteri qandaı dep oılaısyz?

- Qysqy olımpıadalyq oıyndardyń Qazaqstan úshin óte úlken mańyzy bar. Óıtkeni Qazaqstan táýelsizdik alǵannan keıin eń alǵashqy altyn medalin qysqy olımpıadada 1994 jyly Lılı Hamerde alǵan bolatyn. Vladımır Smırnov 50 shaqyrymǵa shańǵymen júgirýden altyn alyp keldi. Ol jarysty aqjoltaı olımpıada deýge bolady. Sondyqtan da ony asyǵa kútemiz. Biraq 1998 jylǵy Nagano olımpıadasynan keıin Qazaqstanda «olımpıada medali» bolǵan emes. Óıtkeni, sol jyly shańǵyshy Vladımır Smırnov pen konkıshi Lıýdmıla Prokasheva ekeýi bir-bir qola medal alyp keldi de, keıingi olımpıadalardyń bárinen - Týrınnen de, onyń aldyndaǵy 2002 jyly Solt Leık Sıtı Olımpıadasynan da qanjyǵamyz bos qaıtty. Bul alty aı qys bolatyn Saryarqa, Soltústik Qazaqstan sııaqty jeri bar elimiz úshin keshirilmeıtin nárse. Biz árbir olımpıada saıyn, áıteýir tosyn syılyq, oryssha aıtqanda «sıýrprız» jańalyq kútemiz, dámelenemiz. Jáne kóp jaǵdaıda sol dámemizdiń ornyn jazǵy Olımpıada toltyrady. Mysalǵa, 2004 jyly Baqtııar Artaevty jeńimpaz bolady dep eshkim kútken joq, 2008 jyly Baqyt Sársekbaev chempıon bolady dep eshkim oılaǵan joq.

- Vankýver oıyndarynda óner kórsetýshi sportshylardyń ishinen kimderden úmit kútesiz?

- Endi, bul joly da biz tym qurysa, kútpegen jerden qanjyǵamyzǵa kem degende bir medal tússe eken dep úmittenemiz. Ol medaldi meniń oıymsha, reseıden kelgen qyz, bıatlonshy Elena Hrýstaleva ákelýi múmkin. Biraq onyń qarsylastary - Reseı, Germanııa quramalary myqty. Degenmen úmit kútemiz. Sodan keıin, erler arasynda jalǵyz mánerlep syrǵanaýdan 16 jastaǵy jas jigit, Denıs Ten degen sportshymyz bar. Odan da bir medal kútýge bolady dep oılaımyn. Onyń baǵdarlamasynda sózsiz favorıt reseılik Evgenıı Plıýşenko degen sportshy bar, ol sodan keıingi oryndarǵa sátin salyp, ilinip qalsa degen úmittemin. Naqty aıta almaımyn, degenmen júldeli orynǵa ilinse dep tileımin. Odan bólek, shańǵymen jarystan bizden Evgenıı Koshevoı, Nıkolaı Chebotko sııaqty Álem kýbogynyń kezeńderinde kózge túsip otyrǵan sportshylarymyz bar. Olar osy olımpıada da kózge túsip qalatyn shyǵar...?! Biraq shańǵymen jarysý baǵdarlamasynda bizde de býyn almasý protsesin tolyq ótip bolmaǵanyn aıtýymyz kerek. Óıtkeni, osydan 4 jyl buryn olımpıadaǵa qatysqandardyń ishinde Alekseı Poltoranın men Evgenıı Koshevoı, sonymen qatar, Nıkolaı Chebotko úsheýi ǵana qatysady. Odnotvortsev sııaqty jigittter bul joly qatyspaıdy. Sondyqtan, jarystyń bul túrine qorqa-qorqa qaraımyz. Qyzdar arasynda shańǵymen júgirýden Oksana ıAtskaıa, Svetlana Malahova, Elena Antonova sııaqty úsh tájrıbıeli shańǵyshymyz bar. Olar olımpıadada alǵashqy ondyqqa kirip kórgen emes. Sondyqtan alǵashqy 20 myqty sportshylardyń qataryna kirse, tóbemizge kóterip, maqtan tutýymyzǵa bolady. Al bizdiń konkıshilerimiz qara kóbeıtýge barady dep oılaımyn. Biz úshin, eger Vankýverdegi bizdiń sportshylarymyz alǵashqy ondyqqa kiretin bolsa, onda Almaty men Astanada ótetin kelesi qysqy Azııa oıyndarynda biz qurlyqta birinshi bolamyz degen sóz. Óıtkeni qazir Azııa boıynsha Qytaı men Koreıa short-trekten myqty, Japonııa mánerlep syrǵanaý men tuǵyrdan sekirýden myqty, al basqa elden bizdiń sportshylarǵa shendesetin sportshy joq. Lıvannyń bir sportshysy bar, slalom túri boıynsha, biraq ol qazir sportty qoıyp ketken kórinedi. Sondyqtan, Vankýver Olımpıadasyn kelesi jylǵy Qysqy Azııa oıyndaryna úlken daıyndyq retinde qarastyryp, sportshylarymyzdyń barsha múmkindigin sarqa paıdalanýǵa tyrysýymyz kerek. Sodan keıigi eń ıgi nárse - bıatlonnan jáne taǵy basqa sporttyń bir eki túrinen qazaq azamattary baraıyn dep jatyr. Olardyń ózi úlken tájirıbe jınap keledi dep esepteımin. Onyń ishinde tý ustaýshy, Azııa, qurlyq deńgeıinde jetistikterimen kózge kórine bilgen, Qazaqstannyń bıatlonnan chempıony, semeılik Dıas Keneshov ta bar. Bizdiń sportshylarymyz úshin Vankýverdegi jarys aldaǵy qysqy Olımpıada oıyndarynyń jańa tynysyn ashady dep senemin.