Vandalızmmen kúres: Atyraýda 111 adamǵa aıyppul salyndy

ATYRAÝ. KAZINFORM – Atyraýda vandalızmmen aınalysqan 6141 adam ákimshilik jazaǵa tartylǵan. Onyń ishinde 111 adamǵa 6 mln teńgege jýyq aıyppul salynǵan

Atyraý qalalyq polıtsııa basqarmasy jergilikti polıtsııa qyzmeti bólimi bastyǵynyń orynbasary Aıbol Іdirisovtiń aıtýynsha, QR Ákimshilik quqyq buzýshylyq týraly kodeksinde qoǵamdyq oryndarǵa nuqsan keltirgenderge arnaıy jaza qarastyrylǵan.

«Qoǵamdyq oryndarǵa nuqsan keltirý jáne qoǵamdyq tártip pen azamattardyń tynyshtyǵyn buzý sekildi áreketter úshin azamattarǵa 15 kúnge ákimshilik qamaýǵa alý nemese 20 aılyq eseptik kórsetkish mólsherindegi aıyppul jazasy qoldanylady. Bıyl jyl basynan beri vandalızm jasaǵan 6141 adam ákimshilik jazaǵa tartyldy. Onyń ishinde 111 adamǵa QR Ákimshilik quqyqbuzýshylyq týraly kodeksiniń 505-babymen 6 mln teńgege jýyq aıyppul salyndy. Aıyppul arqalaǵan 95 adamnan aıyppul somasy tolyqtaı óndirildi», - deıdi Aıbol Іdirisov.

Krımınaldyq polıtsııa basqarmasynyń aǵa jedel ýákili, polıtsııa kapıtany Baýyrjan Ońdasynnyń aıtýyna, vandalızm aktileri, qoǵamdyq jáne jeke múlikti búldirgeni úshin jaza qatańdatylyp otyr.

«Soǵan qaramastan vandaldar aıaldamalardyń áınegin, oryndyqtar men jol silteıtin belgilerdi, eskertý taqtaıshalaryn syndyryp ketedi. Sol sebepten, osyndaı teris áreketterdiń aldyn alý úshin baqylaý sharasy kúsheıtildi», - deıdi Baýyrjan Ońdasyn.

Eske sala ketelik, buǵan deıin vandaldar kúıshi Dına eskertkishiniń QR-taqtasyn teýip qıratqany habarlanǵan edi.