Vandalızmmen kúres: Astanada jyl basynan beri 54 adam qamaýǵa alyndy
ASTANA. KAZINFORM – Elordada jyl basynan beri 54 adam vandalızm boıynsha qamaýǵa alynǵan. Odan bólek, 80 adam ákimshilik jaýapqa tartylyp, 26 adam 4 mıllıon teńgeden astam aıyppul tólegen.
«Búgin LIVE» baǵdarlamasynda vandaldardy jaýapqa tartý jáne atalmysh máselemen kúresý joldary kóterildi.
– Jalpy vandalızm áreketterine Qazaqstan Respýblıkasy Qylmystyq kodeksiniń 294-babyna jáne Ákimshilik quqyq buzýshylyq kodeksiniń 147-1-babyna sáıkes jaza kózdelgen. Bul – bótenniń múlkin qorlaý, qasaqana búldirý. Mundaı áreketter úshin ÁQBtK-ge sáıkes 50 AEK kóleminde aıyppul salynady. Sonymen qatar sottyń sheshimimen 20 kúnge deıin ákimshilik qamaýǵa alý múmkin. Al Qylmystyq kodekske sáıkes, 100 AEK-ten 200 AEK-ke deıin aıyppul tóleıdi. Oǵan qosa, qoǵamdyq jumystarǵa tartylady. Máselen, byltyr Astana qalasy boıynsha 300-den astam azamat 147-1-bap boıynsha jaýapqa tartyldy. Sondaı-aq 180-nen astam turǵyn ákimshilik aıyppul tólep, 130-dan astamy ákimshilik qamaýǵa alynǵan, - deıdi Esil aýdany PB basshysynyń orynbasary Azamat Sadyqov.
Ol óz kezeginde naqty qandaı áreketterdiń vandalızmge jatatynyn atap ótti.
– Eger azamattar qoǵamdyq qundylyqtar, tarıhı-mádenı eskertkishter, mádenı nysandardy boıaý, syzý, búldirý áreketterin jasasa – bul vandalızmge jatady. Al turǵyn úılerdi syzý, boıaý usaq buzaqylyqqa jatady. Ol úshin Ákimshilik quqyq buzýshylyq týraly kodekstiń 505-babynda kózdelgen «Qalalar men eldi mekenderdiń aýmaqtaryn abattandyrý qaǵıdalaryn buzý» týraly zańmen jaýapkershilikke tartylady. Mundaı buzaqylar kóbine túrli úılerdi, aıaldamalardy, ózge adamdardyń kólik quraldaryn búldiredi, - deıdi Azamat Sadyqov.
Polıtsııa qyzmetkerleri azamattar arasynda túsindirý jumystaryn júrgizedi. Tipti kópqabatty úı turǵyndarynyń chattaryna qosylyp, eskertý sharalaryn qabyldaıdy eken.
– Bizdiń ýchaskelik polıtsııa qyzmetkerleri turǵyndardyń chattarynda da bar. Olar onda túsindirý jumystaryn júrgizedi. Odan bólek, mektepter men ýnıversıtetterde dárister ótkizip, aldyn alý sharalaryn jasaıdy. Jalpy vandal áreketterin bizdiń qyzmetkerler kamera arqyly baqylap otyrady. Eger aryzdanýshylar kelip, aryz jazsa, biz izdestirý jumystaryn júrgizemiz, - deıdi polıtsııa qyzmetkeri.
Osydan eki jyl buryn «Jastar Rýhy» Jastar qanatynyń bastamasymen «Vandalızmge jol joq!» aktsııasy bastalǵan edi. Іs-shara barysynda erikti jastar vandaldardyń kesirinen zardap shekken tarıhı-mádenı nysandardy tazartty.
– Vandalızm taqyryby óte ózekti. Sol sebepti «AMANAT» partııasynyń janyndaǵy «Jastar Rýhy» Jastar qanaty «Vandalızmge jol joq!» atty aktsııasyn bastaǵan edik. Oǵan respýblıka boıynsha 3 myńǵa tarta jas atsalysty. Aktsııa aıasynda 700-ge jýyq eskertkish pen kıeli oryndardy bizdiń jastarymyz ben qoǵam belsendileri tazartty, - dedi «Jastar Rýhy» Jastar qanatynyń Astana qalalyq fılıalynyń tóraǵasy Arslanbek Maǵzum.
Bul aktsııanyń negizgi maqsaty – jastardy tazalyqqa tárbıeleý. Sebebi stýdııa qonaǵy mundaı áreketterdi kóbine jastar isteıtinin aıtady.
– Ol sharanyń basty maqsaty – jastar arasynda vandalızmge qarsy mádenıetti qalyptastyrý. Sebebi mundaı áreketterdiń saldarymen ǵana kúresý jetkiliksiz. Biz jastardy tárbıelep, jaǵdaıdyń aldyn alýymyz kerek. Aktsııaǵa qatysýǵa tek jastar ǵana emes, ata-ájeler de nıet bildirdi. Olar bizben birge shyǵyp, tazalaý jumystaryna qatysty. Biz Býrabaı kesheninde Jumbaqtasty tazarttyq. Tańbaly tas, Spassk etno-memorıaldyq kesheni syndy nysandar da tazartyldy. Bizdiń tájirıbemizge súıensek, mundaı áreketterge kóbine jastar barady, - deıdi Arslanbek Maǵzum.
Eske sala keteıik, Qonaev qalasynda tazalyq saqtamaǵan turǵyndarǵa 3 mln teńge aıyppul salyndy.
Odan bólek, BAQ ókilderi arasynda «Taza Qazaqstan – Taza Astana» baıqaýy jarııalandy.