Vandalızmge jaza kúsheıtiledi

ASTANA. KAZINFORM – Vandalızm jasaǵandar 50 táýlikke deıin qamaýǵa alynýy múmkin. Bul týraly Іshki ister mınıstriniń birinshi orynbasary Marat Qojaev aıtty.

«Memleket basshysy vandalızmdi jaǵymsyz qubylys dep, onymen kúresý kerektigin atap ótti. Sol sebepti osy zań jobalaryna ózgerister engizilip jatyr. Vandalızm uǵymy qoldanystaǵy zańmen birge qalady. Bul tarıhı-mura nysandaryn, tarıhı jáne mádenı eskertkishterin, Úkimet qorǵaıtyn tarıh nysandaryn sýret pen basqa da adamgershilikke jatpaıtyn árekettermen qorlaý dep tanylyp otyr. Uǵym qala beredi. Al jaza kúsheıtiledi. Mysaly, aıyppul 100-den 200 AEK-ke deıin ulǵaıtylady. Búginde ol 50-den 160 AEK arasynda. Al qamaýǵa alý merzimi búginde 40 táýlik bolsa, endi 50 táýlikke deıin arttyrylady. Mundaı áreketterdi birneshe ret nemese toppen istese 3 jylǵa deıin bas bostandyǵynan aıyrylýy múmkin. Mundaı jaýapkershilik qazirgi zańdamada joq», — dedi Marat Qojaev Senattyń jalpy otyrysynda.

Sonymen qatar ol Ákimshilik kodekske engiziletin ózgerister men tolyqtyrýlarǵa toqtaldy. 

«Ákimshilik kodekstiń 434-babynyń taǵy bir bóligi bolady. Jat áreketter qoǵamdyq ınfraqurylymǵa kádimgideı shyǵyn keltiredi. Sondyqtan jaýapkershilik kúsheıtiledi. Aıyppul 20-dan 50 AEK deıin ósedi. Al qamaýǵa alý 15-ten 20 táýlikke deıin artady Al eger osy áreketter 1 jyldyń ishinde qaıtalansa, qamaýǵa alýdyń eń joǵary merzimi qoldanylady», — dedi ol. 

Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine adam saýdasyna, vandalızm kórinisine jáne bótenniń múlkin búldirýge qarsy is-qımyl máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine adam saýdasyna, vandalızm kórinisine jáne bótenniń múlkin búldirýge qarsy is-qımyl máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańdary 1-oqylymda maquldaǵan edi.