Vandalızmge qarsy kúres: Astanada jarty jylda 150 adam jaýapqa tartyldy
ASTANA. KAZINFORM – Elordada vandalızm áreketteri men qoǵamdyq tártipti buzý jaǵdaılarynyń aldyn alý boıynsha júıeli jumys jalǵasyp jatyr. Kezekti múlikti búldirý oqıǵalary astanalyq polıtseıler tarapynan anyqtaldy, dep habarlaıdy qala ákimdiginiń resmı saıty.
Máselen, 26 shilde kúni túngi saǵat 03:39 shamasynda Bekturov kóshesindegi turǵyn úılerdiń biriniń kireberisinde 19 jastaǵy jas jigit mas kúıinde aqparattyq stendti judyryqpen uryp, ádeıi syndyrǵan. Oǵan QR Ákimshilik quqyq buzýshylyq týraly kodeksiniń 147-1-baby – «Bógde múlikti qasaqana joıý nemese búldirý» boıynsha ákimshilik jaýapkershilik júkteldi.
Taǵy bir jaǵdaıda 45 jastaǵy qala turǵyny Toyota Avensis markaly avtokólikti zaqymdaǵan: kapotyn, esikterin jáne qanatyn syryp ketken. Materıaldyq zalal keltirildi. Quqyq buzýshynyń tulǵasy anyqtalyp, oǵan da tıisti ákimshilik sharalar qoldanyldy.
2025 jyldyń basynan beri osyǵan uqsas quqyqbuzýshylyqtar úshin 150 adam jaýapqa tartylǵan. Onyń ishinde 82 adam qamaýǵa alynyp, 68 adamǵa aıyppul salynǵan.
«Stop, vandal!» aldyn alý aktsııasy jalǵasyp jatyr. Onyń aıasynda kúndizgi jáne túngi reıdter, turǵyndarmen túsindirý jumysy, sondaı-aq volonterlerdiń, belsendiler men tanymal sportshylardyń qatysýymen túrli is-sharalar ótkizilip keledi.
Negizgi maqsat – azamattardyń qoǵamdyq múlikke jaýapkershilikpen qaraýyn qalyptastyrý jáne quqyqbuzýshylyqtar sanyn azaıtý.
«Zań jáne tártip» qaǵıdaty aıasynda elordalyq polıtsııa men prokýratýra birlesip vandalızmge qarsy belsendi jumys júrgizip keledi. Bógde múlikti ádeıi joıý nemese búldirý úshin 60 AEK-ke deıin aıyppul salý nemese 30 táýlikke deıin qamaýǵa alý jazasy kózdelgen.
Osyǵan deıin elordadaǵy Sáken Seıfýllın kóshesiniń bir bóligi ýaqytsha jabylatynyn habarlaǵan edik.