Vandalızmdi qabyldaýǵa bolmaıdy — Prezıdent

ASTANA. KAZINFORM — Búgin elordanyń «Nura» aýdanyndaǵy Greenline býlvaryn aralap kórgen Memleket basshysy Qasym-Jomart Toqaev qala basshysyna birqatar naqty tapsyrma berdi.

Prezıdentke Astanadaǵy abattandyrý jumystary jaıynda málimet bergen qala ákimi Jeńis Qasymbek elordada qazir 170 qoǵamdyq keńistik pen aýlany abattandyrý boıynsha keshendi baǵdarlama iske asyrylyp jatqanyn aıtty.

— Vandalızm, buzaqylyq bar ma?, — dep surady osy oraıda Memleket basshysy.

Saýalǵa jaýap bergen qala ákimi elordada mundaı keleńsizdiktiń jappaı oryn alýy tirkelmese de jekelegen derekterdiń bar ekenin jasyrǵan joq.

— Vandalızmdi qabyldaýǵa bolmaıdy, buzaqylardy zań boıynsha jaýapkershilikke tartý kerek, — dep tapsyrdy Prezıdent.

Munan bólek, Qasym-Jomart Toqaev elorda ákimine qalany kógaldandyrý — ortaq mindet ekenin eskertti.

— Bul jumystardy ortalyq kóshelerde, kózge túsetin oryndarda ǵana júrgizýmen shektelýge bolmaıdy, — dedi Memleket basshysy.

Prezıdent Astanada oń ózgerister bolǵanymen alda áli de atqarar jumys kóp ekenin basa aıtty.

Eske salsaq, búgin Memleket basshysy «Taza Qazaqstan» ekologııalyq aktsııasyna qatysty. Prezıdent Astana qalasyndaǵy Botanıkalyq saıabaqta erikti jáne belsendi jastarmen birge aǵash ekti.