Vandalızm men qoǵamdyq tártipti buzǵany úshin jaýapkershilikti kúsheıtetin zań qabyldandy
ASTANA. KAZINFORM – Memleket basshysy «Qazaqstan Respýblıkasynyń keıbir zańnamalyq aktilerine adam saýdasyna, vandalızm kórinisine jáne bótenniń múlkin búldirýge qarsy is-qımyl máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Zań Prezıdent Qasym-Jomart Toqaevtyń adam saýdasyna qarsy kúresý, sondaı-aq vandalızm men qoǵamdyq tártipti buzǵany úshin jaýapkershilikti kúsheıtý jónindegi tapsyrmasyn júzege asyrýǵa baǵyttalǵan.
Atap aıtqanda, Qylmystyq kodekske «adam saýdasyna baılanysty qylmystar» degen jańa uǵym engizildi. Ol adam urlaý, adamdy zańsyz bas bostandyǵynan aıyrý, adam saýdasy, onyń ishinde kámeletke tolmaǵandardy satý, jezókshelikpen aınalysýǵa ıtermeleý jáne basqa da qaýipti qylmystyq áreketterdi qamtıdy.
«Zańda mundaı qylmystardy jasaǵany úshin tatýlasý arqyly qylmystyq jaýapkershilikten bosatýǵa tyıym salynady.
Sonymen qatar adamnyń kámeletke tolmaǵanyn bile tura, jezókshelik nemese seksýaldyq sıpattaǵy qyzmetterin paıdalanǵany úshin alǵash ret qylmystyq jaýapkershilik engizildi.
Zańda kámeletke tolmaǵan adamdy seksýaldyq sıpattaǵy qyzmet kórsetýge, sonyń ishinde mundaı isti nasıhattaý nemese jarnamalaý arqyly tartý faktileri qylmys dep tanylady», — dep jazylǵan qujatta.
Budan bólek, Zańda alǵash ret vandalızm qylmysynyń saralanǵan quramdary aıqyndaldy. ıAǵnı áleýmettik, ulttyq, násildik nemese dinı arazdyq sebebimen, bir top adam nemese aldyn ala sóz baılasqan adamdar toby jasaǵan, ásirese, qaraýlyqpen ádeıi ári birneshe ret vandalızm jasaý jaýapkershilikti aýyrlatatyn mán-jaılardyń qataryna jatqyzylady.
Zańda bótenniń múlkin qasaqana joıǵany nemese búldirgeni úshin jaýapkershilik kúsheıtildi. Ony bir top adam nemese birneshe ret jáne qylmystyq top bolyp jasaǵany úshin jaýapkershilik engizildi.
Dál osyndaı qylmystyq jaýapkershilik tarıhı, mádenı eskertkishterdi, tabıǵı keshenderdi nemese memlekettiń qorǵaýyna alynǵan obektilerdi, sondaı-aq erekshe tarıhı, ǵylymı, kórkemdik nemese mádenı qundylyǵy bar zattardy nemese qujattardy qasaqana joıǵany nemese búldirgeni úshin belgilendi.
Osy tektes qylmystardy jasaǵany úshin budan bylaı qylmystyq jaýapkershilikke 16 jastan emes, 14 jastan bastap tartylady.
Zańnyń mátini baspasózde jarııalanady.
