Van I Shahrat Nuryshevke «Kórnekti dıplomat» medalin tabystady
ASTANA.KAZINFORM - Qytaı Halyq Respýblıkasynyń Syrtqy ister mınıstri Van I Qytaı Halyq Respýblıkasyndaǵy QR Tótenshe jáne Ókiletti Elshisi Shahrat Nuryshevke «Kórnekti dıplomat» medalin tabystady, dep habarlaıdy Kazinform agenttiginiń Beıjińdegi tilshisi.
Belgili marapat qazaqstandyq dıplomatqa Qazaqstan men Qytaı arasyndaǵy dostyq baılanysty nyǵaıtýǵa jáne yntymaqtastyqty damytýǵa qosqan erekshe úlesin moıyndaý retinde berildi.
Dúısenbide Qytaı Syrtqy ister mınıstrliginiń baspasóz ortalyǵynda alǵashqy marapattaý rásimi ótti. Shahrat Nuryshev resmı Beıjiń tarapynan eń joǵary baǵaǵa ıe bolǵan segiz qazirgi jáne burynǵy dıplomatııalyq mıssııa basshylarynyń qatarynda boldy.
Qazaqstan ókilimen qatar, marapattar Pákistan, Saýd Arabııasy jáne Kolýmbııa elshilerine, sondaı-aq Reseı, Kambodja, Chad jáne Ýrýgvaıdyń burynǵy dıplomatııalyq mıssııa basshylaryna da tabystaldy.
Buǵan deıin Beıjińde Qazaqstandaǵy konstıtýtsııalyq reformalar boıynsha baspasóz máslıhaty ótkeni habarlanǵan bolatyn.
