Van I: Qytaı men Eýropa — qarsylas emes, seriktes
ASTANA. KAZINFORM — Senbi kúni QHR Syrtqy ister mınıstri Van I Qytaı men Eýropa — júıelik qarsylastar emes, seriktester ekenin aıtty, dep habarlaıdy Sınhýa.
Sondaı-aq, QKP OK Saıası bıýrosynyń múshesi Van I bul málimdemeni Mıýnhen qaýipsizdik konferentsııasy aıasyndaǵy «Qytaı álemde» sessııasyndaǵy sózinen keıin Qytaı men Eýropalyq odaq arasyndaǵy qatynastar týraly suraqtarǵa jaýap berý barysynda jasady.
Dıplomat Qytaı men Eýropa arasyndaǵy seriktestiktiń tereńdigin olardyń jarty ǵasyrdan astam ýaqytqa sozylǵan ózara yqpaldastyǵy jáne kúndelikti taýar aınalymynyń 2 mlrd AQSh dollarynan asatyny aıqyn kórsetetinin atap ótti. Sonymen qatar, ol aıyrmashylyqtardy asyra kórsetý qytaı-eýropalyq qatynastarǵa zııan keltirýi múmkin ekenin eskertti.
Qoǵamdyq qurylym, qundylyqtar men damý joldaryndaǵy aıyrmashylyqtardy moıyndaı otyryp, Van I bul ózgeshelikter bir-birine qarsylas bolýǵa negiz bermeıtinin aıtty. Onyń sózinshe, alshaqtyqtar teketireske sebep bolmaýy tıis. Kerisinshe, durys ustanym — ózara qurmet, ózara qoldaý jáne ózara úırený arqyly birlesip ortaq damýǵa qol jetkizý jáne álemge jaryq syılaý.
QHR SІM basshysy kóne qytaı danalyǵyn mysalǵa keltirdi.
— Barlyq nárse bir-birine kedergi keltirmeı qatar damıdy; barlyq jol bir-birine qaıshy kelmeı qatar júredi», sondaı-aq «izgi adam birkelkilikke emes, úılesimge umtylady, — dedi ol.
Van Idiń túsindirýinshe, bul aıyrmashylyqtardy moıyndaı otyryp, úılesimdi qatar ómir súrýge umtylýdy bildiredi — «izgi adamnyń joly» dep atalatyn qaǵıda. Qytaı men Eýropa osy qaǵıdany basshylyqqa alýy tıis.
Ol búgingi kúrdeli ári turaqsyz halyqaralyq jaǵdaıda eki tarap ta kópjaqtylyqty is júzinde júzege asyryp, BUU bedelin qorǵap, birjaqty qysymǵa qarsy turyp, bloktyq teketireske jol bermeýi kerektigin atap ótti.
Van I taraptar QHR tóraǵasy Sı Tszınpın usynǵan tórt jahandyq bastamany birlesip júzege asyryp, anaǵurlym ádil ári utymdy jahandyq basqarý júıesin qalyptastyrady degen úmit bildirdi. Onyń aıtýynsha, bul qytaı-eýropalyq yntymaqtastyqtyń ortaq baǵytyna aınalýy tıis.
Osyǵan deıin Qytaı men AQSh esirtkige qarsy yntymaqtastyqty nyǵaıtatynyn jazǵanbyz.