Van Gogtyń sýreti rekordty somaǵa satyldy
NUR-SULTAN. QazAqparat - Vınsent Van Gogtyń eshqashan kórmege qoıylmaǵan sýreti Parıjdegi Sotheby's úıinde 13 mıllıonnan astam eýroǵa (6 mıllıard teńgeden astam) satyldy, dep habarlaıdy QazAqparat Deutsche Welle-ge silteme jasap.
Kartınanyń satylymy Modılıanı, Rodın, Kamılla Klodel, Dega, Klı jáne Magrıtt sııaqty sýretshilerdiń 33 týyndysy qoıylǵan aýktsıondy aıaqtady.
«Vınsent Van Gogtyń ǵasyrlar boıy jeke kollektsııada bolǵan jáne osy aptada alǵash ret kópshilik nazaryna usynylǵan «Monmartrdaǵy kóshe kórinisi» kartınasy Parıjde 13 091250 eýroǵa satyldy», - dep habarlandy aýktsıon úıiniń Twitter paraqshasynda.
«Monmartrdaǵy kóshe kórinisin» Van Gog 1887 jyly Parıjde aǵasy Teomen birge turǵan kezde salǵan. Kartınada Monmartrdyń nyshandarynyń biri - Mýlen de la Galettegi jel dıirmeni beınelengen. Bul jumys 1920 jyldan bastap jeke kollektsııada saqtalyp kelgen.
«Monmartr kezeńindegi Van Gogtyń sýretteri álemdegi bedeldi murajaı kollektsııalarynda emes, jeke kollektsııalarda saqtalady. Osyndaı ańyzǵa aınalǵan týyndynyń naryqqa shyǵýy óte mańyzdy oqıǵa», - dep málimdedi Sotheby's ókilderi.
Aıta ketý kerek, sýrettiń aldyn ala baǵasy 5-8 mıllıon eýrony quraǵan.
