Van Gogtyń kartınasy aýktsıonda rekordtyq baǵaǵa satyldy
ASTANA. KAZINFORM — Nıderland sýretshisi Vınsent van Gogtyń «Gúldegen talshyndar» («Tsvetýşıe kashtany») atty kartınasy Nıý-Iorktegi Sotheby’s aýktsıonynda 190,43 mıllıon dollarǵa satyldy. Bul — sýretshiniń aýktsıonǵa qoıylǵan týyndylary arasyndaǵy rekordtyq kórsetkish, dep jazady DW.
Kartınany satýǵa onyń qazirgi ıeleri men nemis baspageri Samýel Fısherdiń muragerleri arasyndaǵy daý kedergi bolǵan. Fısher otbasy týyndyny Ekinshi dúnıejúzilik soǵysqa deıin ıelengen. Alaıda aýktsıon bastalardan bir kún buryn taraptar kelisimge kelip, týyndy satylymǵa qoıyldy.
Van Gog kartınany 1890 jylǵy mamyrda Frantsııanyń Over-sıýr-Ýaz qalasynda, qaıtys bolarynan eki aı buryn salǵan. Onda jol boıynda gúldegen talshyn aǵashtary men jolmen ketip bara jatqan er adam jáne úsh áıel beınelengen.
S. Fischer baspasynyń negizin qalaǵan evreı kollektsıoneri Samýel Fısher kartınany 1909 jyly Parıjden satyp alǵan. Ol qaıtys bolǵannan keıin týyndy jubaıyna muraǵa qalǵan. Týyndy 1936 jyly basqa otbasynyń qolyna ótken. 1975 jyly kartınany Argentınanyń Blake-Arreta otbasy satyp alyp, shamamen jarty ǵasyr saqtaǵan.
Samýel Fısherdiń muragerleri kartınanyń 1936 jyly erikti túrde satylmaǵanyn alǵa tartty. Olardyń pikirinshe, Germanııada evreıler qýdalanǵan kezeńde otbasy týyndydan amalsyz aıyrylǵan. Muragerlerdiń advokaty Gýnnar Shnabel sol kezdegi saýdanyń naryqtyq baǵamen jasalǵanyn jáne kemsitýshiliktiń saldary bolmaǵanyn dáleldeýdi talap etti.
Al Sotheby’s aýktsıon úıi kartınanyń ıelik tarıhyn jan-jaqty zerttegenin málimdedi. Zertteý qorytyndysy boıynsha týyndy 1932-1933 jyldary Amsterdamda saqtalyp, 1936 jylǵy maýsymda 68 myń shveıtsar frankine satylǵan. Aýktsıon úıi kartınanyń májbúrli túrde nemese naryqtyq baǵadan tómen satylǵanyn rastaıtyn dálel tappaǵanyn habarlady.
Saýda aldynda eki otbasynyń muragerleri kelisimge kelgen. Onyń sharttary jarııalanǵan joq. Sotheby’s bul kelisim Fısher otbasynyń Holokost jyldaryndaǵy kórgen qasiretin moıyndaýǵa jáne kartınany satýǵa múmkindik bergenin atap ótti.
Buǵan deıin Van Gogtyń aýktsıonda eń qymbat satylǵan týyndysy «Kıparıster arasyndaǵy jemis baǵy» kartınasy bolatyn. Ol 2022 jyly 117,2 mıllıon dollarǵa baǵalanǵan.
Eske salaıyq, bıyl qyrkúıek aıynda Van Gogtyń barlyq kartınasy 40 jylda alǵash ret bir kórmege qoıylady.