Van Gogtyń barlyq kartınasy 40 jylda alǵash ret bir kórmege qoıylady
ASTANA. KAZINFORM — Nıderlandtaǵy Kreller-Mıýller mýzeıi óz kollektsııasyndaǵy Vınsent van Gogtyń 88 kartınasyn kópshilik nazaryna usyndy. Sýretshiniń barlyq týyndysy shamamen 40 jyldan beri bir mezette kórmege qoıylmaǵan, dep habarlaıdy DW.
Kórmege qoıylǵan týyndylardyń qatarynda «Kartop jegender», «Túngi kafeniń terrasasy» jáne «Nıýenendegi eski munara» kartınalary bar.
Kreller-Mıýller mýzeıinde Van Gog shyǵarmalarynyń álemdegi eń iri kollektsııalarynyń biri saqtaýly. Alaıda sýretshiniń mýzeı qoryndaǵy barlyq týyndysyn bir ýaqytta kórmege shyǵarý óte sırek kezdesedi.
Mýzeı ókilderiniń aıtýynsha, qazirgi ekspozıtsııa sońǵy birneshe onjyldyqtaǵy Van Gog shyǵarmalarynyń eń aýqymdy kórmeleriniń birine aınaldy.
Sýretshi óziniń qysqa shyǵarmashylyq jolynda shamamen 900 kartına salǵan. Vınsent van Gog 1890 jyly 37 jasynda qaıtys boldy. Ol keýdesine oq tıip, jaralanǵannan keıin eki kún ótken soń kóz jumǵan.
Aıta keteıik, «Van Gog: Bizdiń barlyq kartınalarymyz» dep atalatyn kórme qańtarǵa deıin jalǵasady.
Osydan 4 jyl buryn ǵalymdar Van Gogtyń buryn belgisiz bolǵan avtoportretin tapty. Ol sýretshiniń Shotlandııadaǵy ulttyq galereıasynda saqtaýly turǵan «Aq qalpaqtaǵy sharýa áıel portreti» atty áıgili kartınasynyń artyna qystyrylyp qalǵan eken.
